صدر زرداری سے ایرانی ہم منصب کی ملاقات، مذاکرات اور تعاون کو مزید فروغ دینے پر اتفاق

اسلام آبا ( طاہر خلیل، نمائندہ خصوصی،نامہ نگار خصوصی ، نیوز ایجنسیاں )،ضیافت سے قبل صدر آصف علی زرداری اور ایرانی صدر ابراہیم رئیسی کے درمیان ایوان صدر میں اہم ملاقات ہو ئی اس موقع پر مذاکرات اور تعاون کو مزید فروغ دینے پر اتفاق کیا گیا ۔ ایرانی صدر آج لاہور اور کراچی کا دورہ کریں گے۔ لاہور میں بھی عام تعطیل کا اعلان کردیاگیا۔صدر زرداری نے ایرانی ہم منصب کا ایوان صدر آمد پر استقبال کیا، دونوں رہنمائوں نے اہم علاقائی اور عالمی سطح پر ہونے والی پیش رفت بالخصوص مشرق وسطیٰ کی صورتحال پر بھی تبادلہ خیال کیا۔دونوں صدور نے غزہ کے عوام پر اسرائیلی جبر کے خاتمے، انسانی امداد میں اضافے کیلئے بین الاقوامی کوششیں تیز کرنے کی ضرورت پر زور دیا۔ صدر زرداری نے اصولی موقف اور مقبوضہ جموں و کشمیر کے عوام اور ان کے حق خودارادیت کی مسلسل حمایت پر ایران کو سراہا۔ انہوں نے کہا کہ دونوں ممالک میں دوطرفہ تجارت 10 ارب ڈالر کی سطح تک بڑھانے کی بے پناہ صلاحیت موجود ہے۔ایرانی صدرنے باہمی دلچسپی کے تمام شعبوں میں دوطرفہ تعلقات مزید وسیع اور مضبوط بنانے کی ضرورت پر زور دیا۔ بعد ازاں صدر مملکت نے ابراہیم رئیسی کے اعزاز میں ضیافت کا اہتمام کیا ۔ادھر چیئرمین سینیٹ یوسف رضا گیلانی کی ایران کے صدر ابراہیم رئیسی سے اسلام آباد کے مقامی ہوٹل میں ملاقات ہوئی۔ ملاقات میں باہمی دلچسپی کے امور سمیت پارلیمانی روابط، علاقائی تعاون اور دوطرفہ تعلقات کو مزید فروغ دینے ، دونوں ممالک کے درمیان باہمی تعلقات کو مزید مضبوط بنانے کیلئے دو طرفہ مذاکرات کی اہمیت پر بھی زور دیا گیا۔دریں اثناء سپیکر قومی اسمبلی سردار ایاز صادق نے ایران کے صدرکیساتھ ملاقات میں گفتگو کرتے ہوئے کہا کہ صدر رئیسی کے دورہ پاکستان سے نا صرف دونوں برادر اسلامی ممالک میں تعلقات میں اضافہ ہوگا بلکہ اس دورے کے خطے کے دیگر ممالک پر بھی دور رس نتائج مرتب ہونگے ۔