بجلی اور پٹرول کی قیمتوں میں کمی کیلئے فیصلے کرنے ہوں گے،شاہد خاقان عباسی

اسلام آباد (نمائندہ جنگ) سابق وزیر اعظم شاہد خاقان عباسی نے کہا ہے کہ بجلی اور پٹرول کی قیمتوں میں کمی کیلئے فیصلے کرنے ہوں گے۔ گیس پائپ لائن سیاسی نہیں قانونی معاملہ ہے۔ گزشتہ روز جوڈیشل کمپلیکس اسلام آباد کے باہر میڈیا سے گفتگو کرتے ہوئے انہوں نے کہا کہ ایل این جی کیس کو پانچواں سال شروع ہو چکا ہے ، 2000 میں بھی ایک کیس 9 سال تک چلا تھا ، میرا خیال ہے دو تین سال اور گزرے تو نیب سے ہمیں پنشن لینا پڑے گی ، اٹھارہ سال میں پنشن ہو جاتی ہے اور اب تو چودہ سال ہو گئے ہیں۔ شاہد خاقان عباسی نے کہا کہ بجلی اور پٹرول کی قیمتوں میں کمی کے لئے محنت کرنی ہو گی ، فیصلے کرنے ہوں گے۔ ان کا کہنا تھا کہ پہلے ایک ناکام حکومت تھی ، دعا کریں گے اللہ انہیں ہدایت دے۔ پیش گوئی کرنے والوں کی حالت آپ نے دیکھ لی ہے۔ ایران ہمارا ہمسایہ ملک ہے ، یہ تعلقات مزید بھی بڑھنے چاہئیں۔ گیس پائپ لائن سیاسی ایشو نہیں ہے یہ ایک لیگل ایشو ہے۔