پنجاب کا ضمنی الیکشن پولیس نے لڑا ، KP میں دھاندلی نہیں ہوئی،بانی پی ٹی آئی

اسلام آباد (خبر نگار) بانی پی ٹی آئی عمران خان نے کہا ہے کہ پنجاب کا ضمنی الیکشن پولیس نے لڑا ، کے پی میں کوئی ایف آئی آر کٹی نہ دھاندلی ہوئی ،پی ٹی آئی کا نام و نشان ختم کرنے کیلئے ہر حربہ استعمال کیا گیا ، عدلیہ سے لوگوں کا اعتماد اٹھتا جا رہا ہے ، موجودہ سیٹ اپ پاکستان کے مستقبل کو نقصان پہنچا رہا ہے ، ڈیل کی نہ مجھ سے کسی نے کوئی بات کی نہ ہی کوئی پیغام آیا،سوال یہ ہے کہ وہ مجھ سے کس بات پر ڈیل کرینگے۔ گزشتہ روز بانی پی ٹی آئی نے اڈیالہ جیل کے کمرہ عدالت میں میڈیا سے غیر رسمی گفتگوکرتے ہوئے کہاکہ جمہوریت قانون کی بالادستی اور فری اینڈ فیئر الیکشن پر کھڑی ہوتی ہے۔ ملک میں جنگل کا قانون ہے۔ پنجاب کے ضمنی الیکشن میں پولیس نے مداخلت کی، ملک میں کوئی جمہوریت نہیں، یہ آٹھ فروری سے ڈرے ہوئے تھے، اکتوبر سے فروری تک انتخابات صرف پی ٹی آئی کو کرش کرنے کیلئے ملتوی کئے گئے۔انہوں نے کہا میری بیوی کا سیاست سے کوئی تعلق نہیں اسے سزا دلوا کر ایک کمرے میں بند کر دیا گیا ، میری تینوں بہنوں کیخلاف مقدمات درج کئے گئے، مریم نواز اور بے نظیر سیاست میں تھیں ، میری اہلیہ کا سیاست سے کوئی تعلق نہیں۔