دہشتگردی سے نمٹنے کیلئے ایکشن پلان پر عملدرآمد یقینی بنایا جائے ، شہداء فورم بلوچستان

اسلام آباد(ر انامسعود حسین) شہداء فورم بلوچستان نے سپریم کورٹ میں دائر آئینی درخواست میں استدعا کی ہے دہشتگردی سے نمٹنے کیلئے نیشنل ایکشن پلان پر عملدرآمد یقینی بنایا جائے، سوشل میڈیا پر دہشتگردی کے فروغ وتشہیر اور جعلی خبروں کو روکنے کیلئے قانونی سازی کی جائے،لاپتا افراد کے نام پر پروپیگنڈا کرنے اوردہشت گرد وں کو پروپیگنڈا کےطور پر لاپتہ افراد کی فہرست میں شمار کروانے والوں کے خلاف قانونی کارروائی کرنے کا حکم جاری کرنے کی استدعا کی ہے۔درخواست گزار وشہدا فورم بلوچستان کے پیٹرن ان چیف، نوابزادہ جمال رئیسانی نے منگل کے روزحافظ احسان کھوکھر ایڈوکیٹ کے ذریعے آئین کے آرٹیکل 184/3کے تحت دائر کی گئی درخواست میں وفاقی حکومت کو بذریعہ وزارت قانون ،دفاع اور داخلہ جبکہ چاروں صوبائی حکومتوں کو متعلقہ چیف سیکرٹریوں کے ذریعے فریق بناتے ہوئے ملک میں دہشت گردی سے نمٹنے کے لیے نیشنل ایکشن پلان 2014پر عمل درآمد یقینی بنانے کی استدعا کی ہے۔