سعد رفیق کا پرانی تقریر کو ایڈٹ کرکے جاری کرنے پر پی ٹی آئی کیخلاف قانونی کارروائی کا اعلان

لاہور(مانیٹرنگ ڈیسک) مسلم لیگ ن کے سینئررہنماءخواجہ سعد رفیق نے اپنی تقریر ایڈٹ کر کے جاری کرنے پر پی ٹی آئی کیخلاف قانونی کارروائی کااعلان کرتے ہوئے کہا ہے کہ پی ٹی آئی والوں نے ان کی تقریباً 2 سال پرانی تقریر کو ایڈیٹ کیا ہے جس سے تقریر کا مطلب ہی بدل گیا ہے۔ فراڈ، جھوٹ اور سازش میں پی ٹی آئی کا کوئی ثانی نہیں ہے۔اس غیر قانونی عمل پر وفاقی تحقیقاتی ادارے (ایف آئی اے) کے ذریعے قانونی چارہ جوئی کی جائیگی۔اپنے ایک بیان میں ن لیگی رہنماءسعد رفیق کا کہنا تھا کہ میں ان کو نوٹس بھجوا رہا ہوں اب انہیں بتانا پڑیگا کہ میری پرانی تقریر کو ایڈٹ کرکے کیوں جھوٹا پروپیگنڈا کیا گیا انہیں اب جواب دینا ہوگا ۔ پی ٹی آئی والوں کا وطیرہ رہا ہے کہ وہ ہر چیز میں جھوٹ بولے اور عوام کو گمراہ کیا جائے ۔یہ لوگ جھوٹے پروپیگنڈے کرکے عوام کو دھوکہ نہیں دے سکتے ۔انہیں چاہئے کہ سیاست کا مقابلہ صرف سیاست کے میدان میں کریں نہ کہ سوشل میڈیاپر جھوٹی افواہیں پھیلا کر عوام کو گمراہ کریں ۔ ہم صبرو تحمل کا مظاہرہ کررہے ہیں لیکن اس کا یہ مطلب نہیں کہ پی ٹی آئی والے ہمارے خلاف جو مرضی بولتے رہیں اور ہم چپ بیٹھ کر سب کچھ دیکھتے رہیں ۔