PTIمیں بشریٰ بی بی کی خوشنودی کیلئے دوڑ لگی ہے،عطاءتارڑ

کراچی (ٹی وی رپورٹ) جیوکے پروگرام ”آج شاہزیب خانزادہ کے ساتھ“ میں گفتگو کرتے ہوئے وفاقی وزیر اطلاعات عطاء تارڑ نے کہا ہے کہ اگر بشریٰ بی بی نے دیکھ لیا تھا کہ ٹوائلٹ کلینر ملایا گیا تو آپ نے کھانا کیوں کھایا؟، پی ٹی آئی میں بشریٰ بی بی کی خوشنودی حاصل کرنے کی دوڑ لگی ہوئی ہے۔ سینئر صحافی و تجزیہ کار محمل سرفراز نے کہا کہ عمران خان نعرہ اینٹی اسٹیبلشمنٹ لاتے ہیں مگر ڈیل بھی اسٹیبلشمنٹ کے ساتھ چاہتے ہیں، ابھی تک حکومت اور اسٹیبلشمنٹ کے درمیان سب اچھا چل رہا ہے، حکومت معاشی کارکردگی نہیں دکھاسکی تو اسٹیبلشمنٹ اس کا بوجھ نہیں اٹھاسکے گی۔ سینئر صحافی و تجزیہ کار عمر چیمہ نے کہا کہ حکومت کی سطح پر سیاسی درجہ حرارت کم کرنے کی سوچ پائی جاتی ہے، مستقبل قریب میں اسٹیبلشمنٹ کے ساتھ عمران خان کی ڈیل ہوتی نظر نہیں آرہی۔ میزبان شاہزیب خانزادہ نے تجزیہ پیش کرتے ہوئے کہا تحریک انصاف میں کنفیوژن مزید بڑھ گئی ہے، تحریک انصاف کے رہنما مسلسل کہہ رہے ہیں کہ عمران خان اسی ماہ جیل سے باہر آجائیں گے، لیکن عمران خان نے پیغام بھیجا ہے ستمبر اکتوبر سے پہلے جیل سے باہر آنے کی توقع نہیں ، بشریٰ بی بی کی صحت اس وقت ایک معمہ بن گئی ہے۔