اربوں روپے کی کرپشن کرنیوالوں کو بھاگنے نہیں دیا جائیگا امیرمقام

28 نومبر ، 2021

پشاور(نمائندہ خصوصی)پاکستان مسلم لیگ (ن) خیبر پختونخوا کے صوبائی صدر انجینئر امیر مقام نے کہا ہے کہ پی ٹی آئی کے لئے فنڈنگ کرنے والوں کو لوٹ مار کی کھلی چھٹی دے دی گئی ہے ۔ آٹے، چینی، پٹرول بحران میں عوام کی جیبوں پر اربوں روپے کا ڈاکہ ڈالنے بی آر ٹی بلین ٹریز مہنگائی فرنس آئیل کی خریداری اورکورونا فنڈنگ میں اربوں روپے کی کرپشن کرنے والوں کا احتساب کرنے کی بجائے این آر او دے دیا گیا ہے کرکٹ کی آمدنی سے بنی گالہ میں کئی ایکڑ رقبہ پر کوٹھی نہیں بنائی جا سکتی۔ اربوں روپے کی کرپشن کرنے والوں کو بھاگنے نہیں دیاجائے گا اور اربوں روپے کی قومی دولت لوٹنے والے قومی مجرموں کوعوام کی عدالت کے کٹہرے میں کھڑا کر کے ان کا محاسبہ کیا جائے گا۔ انجینئر امیر مقام نے پارٹی عہدیدارو ں سے گفتگو کرتے ہوئے کہا کہ حکمرانوں کی طرف سے اپنی چوری چھپانے کے لئے چور چور کا شور مچایا جارہا تھا لیکن حکمرانوں کی اربوں رپوے کی چوری رنگے ہاتھوں پکڑی جانے پر حکمران بے نقاب ہو گئے ہیں۔ وزیراعظم کے سیاسی مخالفین کو احتساب کے نام پر انتقام کا نشانہ بنایا جا رہا ہے جبکہ اربوں روپے کی کرپشن کرنے والے قومی مجرموں کا احتساب کرنے کی بجائے سرپرستی کی جا رہی ہے۔