800 سول ڈیفنس ملازمین 2 ماہ سے تنخواہوں سے محروم ، نوبت فاقوں تک پہنچ گئی ، افسران معاملے کو سنجیدہ لینے کیلئے تیار نہیں

لاہور(نسیم قریشی سے )کمشنر لاہور،ڈپٹی کمشنر لاہور،سیکرٹریٹ،بلدیہ عظمی، اسسٹنٹ کمشنرز دفاتر اور کمشنر آفس میں تعینات 800 سے زائد سول ڈیفنس ملازمین 2 ماہ سے تنخواہوں سے محروم ہیں۔ذرائع کا بتانا ہے کہ ا فسران کیساتھ اور دفاتر میں ہر وقت متحرک رہنے والے ملازمین کو تنخواہوں کی ادائیگیاں تاخیر کا شکار ہونا معمول بن گیا ہے، جس کے باعث سول ڈیفنس کے ملازمین کے گھروں میں نوبت فاقوں تک پہنچ چکی ہے۔سول ڈیفنس کے ملازمین نے نام ظاہر نہ کرنےپر بتایا کہ اپنے گھر کا کچن چلانے کیلئے بنیادی اشیائے ضروریہ خریدنے سے بھی محروم ہیں جبکہ تمام افسران معاملے کو سنجیدہ لینے کیلئے تیار نہیں ہیں۔ سول ڈیفنس ملازمین نے شکوہ کیاکہ دن رات فیلڈ اور دفاتر میں سب سے زیادہ متحرک رہ کر کام کرنے والے ملازمین کے پیٹ کا ایندھن بھرنے اور تنخواہوں کی بروقت ادائیگی بارے کوئی آفیسر نہیں سوچتا۔ ملازمین نے اعلی افسران سے مطالبہ کیا ہے کہ انہیں تنخواہوں کی بروقت ادائیگی ممکن بنائی جائے۔