پاکستان پٹرولیم لمیٹڈ کے ایم ڈی معین رضا سے استعفیٰ لے لیا گیا

اسلام آباد (حنیف خالد) پاکستان پٹرولیم لمیٹڈ کے منیجنگ ڈائریکٹر معین رضا سے وفاقی وزیر توانائی حماد اظہر اور وفاقی سیکرٹری پٹرولیم ڈویژن ارشد محمود نے باہمی مشاورت سے استعفیٰ لے لیا ہے۔ معین رضا اگرچہ فروری 2021ء میں ریٹائرڈ ہو کر پنشن اور دیگر تمام مراعات لے چکے تھے مگر اسکے باوجود وہ اپنے جانشین کی تقرری کے انتظار میں ایم ڈی پی پی ایل کے عہدے پر ہر قسم کے فیصلے کرتے رہے۔ وفاقی وزارت پٹرولیم و قدرتی وسائل (انرجی ڈویژن) نے بھی آنکھیں بند کر لیں اور مسلسل 9ماہ تک ریٹائرمنٹ کے بعد پنشن پر جانے والے معین رضا کو ایم ڈی پی پی ایل کے عہدے پر کام کرنے دیا گیا‘ حالانکہ اتنا اہم قومی عہدہ ایک مہینہ بھی خالی نہیں ہوتا مگر ذرائع کے مطابق معین رضا پر بااثر حلقوں کی اشیرباد تھی اسی لئے وہ اس عہدے پر نومبر کے آخری ہفتے تک براجمان رہے۔ وزارت کے ذرائع کے مطابق پاکستان پٹرولیم لمیٹڈ کے نئے منیجنگ ڈائریکٹر کیلئے نام منگوا لئے گئے ہیں جنہیں شارٹ لسٹ کر کے وفاقی وزیر انرجی حماد اظہر اور وفاقی سیکرٹری انرجی ڈویژن ارشد محمود باہمی مشاورت سے منگل کو ہونیوالے وفاقی کابینہ کے اجلاس میں جو وزیراعظم عمران خان کی صدارت میں ہو گا میں تین ناموں کی شارٹ لسٹ کر کے سمری پیش کرینگے۔