آئی ایم ایف کی سگریٹ پر یکساں ٹیکس کیلئےسفارشات قابل تعریف فوری عمل کیا جائے ،کیپٹل کالنگ

اسلام آباد(آئی این پی)اسلام آباد میں قائم تھنک ٹینک کیپٹل کالنگ نے نشاندہی کی ہے کہ سگریٹ مینوفیکچرنگ ان شعبوں میں سے ایک ہے جہاں جلد از جلد ٹیکس اصلاحات کی ضرورت ہے جیسا کہ (آئی ایم ایف)نے ٹیکس مراعات کو ان معاملات تک محدود کرنے کی ضرورت پر زور دیا ہے جہاں ان کے معاشی فوائد، جیسے کہ روزگار کی فراہمی اور معیشت میں قدر میں اضافہ، بجٹ کے اخراجات سے زیادہ ہے کیونکہ پاکستان توسیعی فنڈ سہولت (ای ایف ایف )کے تحت 6 سے 8 ارب ڈالر تک کا نیا بیل آٹ پیکج چاہتا ہے۔بین الاقوامی اسلامی یونیورسٹی اسلام آباد کے ڈاکٹر حسن شہزاد نے محققین کے ایک گروپ کی بحث میں اظہار خیال کرتے ہوئے کہا کہ سگریٹ مینوفیکچرنگ انڈسٹری کا روزگار پیدا کرنے یا معیشت میں اضافے کا کردار نہ ہونے کے برابر ہے جبکہ پاکستان میں ہر سال 163,600 سے زیادہ افراد کو متاثر کرتا ہے۔قائد اعظم یونیورسٹی کے زمان ریسرچ سنٹر کے سربراہ ڈاکٹر محمد زمان نے کہا کہ اس بات کے شواہد موجود ہیں کہ تمباکو کی کھپت اس وقت کم ہوتی ہے جب اس کی قیمت بڑھ جاتی ہے کیونکہ یہ بہت سے صارفین کی پہنچ سے باہر ہو جاتا ہے۔انہوں نے کہا کہ سگریٹ پر یکساں ٹیکس کے لیے آئی ایم ایف کی سفارشات خواہ ان کے مقامی یا غیر ملکی برانڈز ہوں، قابل تعریف ہیں اور ان پر فوری عمل درآمد کیا جانا چاہیے۔