سارک سیکرٹری جنرل آئندہ ہفتے پاکستان آئیں گے

اسلام آباد (فاروق اقدس) مصدقہ ذرائع سے معلوم ہوا ہے کہ جنوبی ایشیائی ممالک کی تنظیم سارک کے سیکرٹری جنرل غلام سرور جن کا تعلق بنگلہ دیش سے ہے آئندہ ہفتے پاکستان کے دورے پر اسلام آباد آئیں گے۔ جہاں وہ وزیراعظم شہباز شریف، نائب وزیراعظم اور وزیر خارجہ اسحاق ڈار سمیت دیگر اعلیٰ حکام سے بھی ملاقاتیں کریں گے۔ اسلام آباد میں سفارتی ذرائع کے مطابق ان ملاقاتوں میں سارک کے سیکرٹری جنرل تنظیم کی فعالیت کیلئے بعض اقدامات ازسرنو شروع کرنے سمیت متعلقہ امور پر مشاورت کریں گے۔ واضح رہے کہ سارک تنظیم کا رکن ملک نیپال پہلے ہی سارک ممالک کے خارجہ سیکرٹریوں کے اجلاس کی تجویز دے چکا ہے، سارک تنظیم کے سیکرٹری جنرل اپنے دورے میں اس حوالے سے وزارت خارجہ میں اہم ملاقاتیں کریں گے۔ اسلام آباد میں ان کے قیام اور مصروفیات کو سارک تنظیم کی فعالیت کے حوالے سے اہم قرار دیا جارہا ہے۔