شاعر احمد فرہاد لاپتہ کیس ، سیکرٹری دفاع سے پیر تک تفصیلی رپورٹ طلب

اسلام آباد (خبر نگار) اسلام آباد ہائیکورٹ کے جسٹس محسن اختر کیانی نے شاعر احمد فرہاد کی بازیابی کی درخواست پر سیکرٹری دفاع سے پیر تک تفصیلی رپورٹ طلب کرنے کے حکم کا تحریری حکم نامہ جاری کر دیا۔ عدالت نے کہا کہ سیکرٹری دفاع بتائیں احمد فرہاد اسلام آباد سے کیسے لاپتہ ہوئے؟ رپورٹس لیکر رپورٹ جمع کرائیں، درخواست گزار نے خاص طور پر قومی ادارے کو درخواست میں نامزد کیا ہے، سیکرٹری دفاع بتائیں اسلام آباد سے کیوں اور کیسے احمد فرہاد لاپتہ ہوئے؟ قومی ادار وں سے رپورٹس لے کر سیکرٹری دفاع رپورٹ جمع کرائیں۔ عدالت کو پولیس حکام نے بتایا کہ جوائنٹ انوسٹی گیشن ٹیم تشکیل دے دی ہے ، سی سی ٹی وی فوٹیج حاصل کر لی ، جیو فینسنگ کی جا رہی ہے، جہاں سے احمد فرہاد لاپتہ ہوا وہاں سیف سٹی کیمرے نہیں ، پولیس نے بتا یا معاملے پر لا انفورسمنٹ ایجنسیز کو بھی خطوط لکھ دئیے ہیں۔