لشکری رئیسانی سے مصطفیٰ نواز کھوکھر کی ملاقات، ملکی حالات پر اظہار تشویش

کوئٹہ/اسلام آباد(آن لائن)سینیٹ کی انسانی حقوق کمیٹی کے سابق سربراہ بیرسٹر مصطفیٰ نواز کھوکھر نے سینئر سیاستدان وسابق سینیٹر نوابزادہ حاجی میر لشکری خان رئیسانی سے سراوان ہاؤس میں ملاقات کی، اس موقع پر سابق وفاقی وزیر میر ہمایوں عزیز کرد بھی موجود تھے۔ ملاقات میں صوبے اور ملک کی اجتماعی سیاسی صورتحال ،درپیش بحرانوں کا جائزہ لیا گیااورملک کے مجموعی حالات پر تشویش کا اظہارکیا گیا جبکہ صوبے کے اہم امور پرطویل گفتگو ہوئی اور باہمی دلچسپی کے اہم امور پر بھی تبادلہ خیال کیا گیا۔درایں اثناء سینئر سیاستدان وسابق سینیٹر نوابزادہ حاجی میر لشکری خان رئیسانی نے معروف ادیب، شاعر،مصنف، افسانہ نگار ،کمپیئر و نیوز کاسٹر میر محمد الفت کی وفات پر دلی رنج و غم کا اظہار کرتے ہوئے کہا ہے کہ میر محمد الفت نے دہائیوں پر محیط اپنے فنی کیرئیر میں مادری زبانوں و ادب کے فروغ کیلئے گراں قدر خدمات انجام دیں ان کی خدمات ناقابل فراموش ہیں، میر محمد الفت کی وفات سے بلوچستان میں زبان و ادب کے شعبہ میں ایک بہت بڑا خلا پیدا ہوا ہے۔