بلوچستان میں ہر شعبہ سراپا احتجاج اور غربت عروج پر ہے‘ مولانا ہاشمی

کوئٹہ(پ ر)جماعت اسلامی بلوچستان کے امیر مولاناعبدالحق ہاشمی نے کہاہے کہ حکومت بلوچستان میں ہڑتالی ملازمین کے مسائل حل اوربدعنوانی ومفت خوری ختم کرے۔ہرشعبہ سراپا احتجاج اوربے روزگاری وغربت انتہا پر ہے۔ نوجوانوں کوروزگاراورعوام کو کاروبار کے مواقع فراہم کئے جائیں۔ انہوں نے کہاکہ دور دراز علاقوں اوربڑے شہروں کی ترقی کیلئے ماسٹرپلان بناکرمیگاپراجیکٹس شروع کئے جائیں۔بدقسمتی سے بلوچستان میں کئی عشروں سے ترقی وخوشحالی کاکوئی میگاپراجیکٹس شروع نہیں کیاجاسکاجس کی وجہ سے ہرطرف مسائل ومشکلات اورپریشانیاں ہیں۔ حکومتوں اور عوام کے درمیان اعتماد کا رشتہ بحال ہوجائے تو پاکستان حقیقی معنوں میں اسلامی فلاحی ریاست بن سکتا ہے،جماعت اسلامی عوامی مسائل ومشکلات پرہرفورم میں آوازاٹھارہی ہے۔انہوں نے کہا کہ جماعت اسلامی الخدمت کی جانب سے غزہ کے مظلوموں کی مدد کے لئے بیش بہا کام جاری ہے۔