آسٹریا کااقوام متحدہ کی ریلیف اینڈ ورکس ایجنسی برائے فلسطینی پناہ گزین کیلئے فنڈنگ بحال کرنے کا فیصلہ

ویانا (اے ایف پی) آسٹریا نے گزشتہ روز کہا کہ وہ اقوام متحدہ کی ریلیف اینڈ ورکس ایجنسی برائے فلسطینی پناہ گزین(انروا)کیلئے فنڈنگ بحال کر دے گا۔ وزارت خارجہ نے ایک بیان میں کہا کہ امدادی تنظیم کے کام کو بہتر بنانے کے لیےانرواکےپیش کیے گئے ایکشن پلان کا تفصیلی جائزہ لینےکے بعدآسٹریا نے فنڈز جاری کرنے کا فیصلہ کیا ہے۔بیان میں کہا گیا ہے کہ 2024 کے لیے کل 3.4 ملین یورو (3.7 ملین ڈالر) کے فنڈز کا بجٹ رکھا گیا ہے، اور پہلی ادائیگی موسم گرما میں متوقع ہے۔بیان میں مزید کہاگیا کہ آسٹریا کے کچھ فنڈز مستقبل میں انروا میں اندرونی کنٹرول کے طریقہ کار کو بہتر بنانے کے لیے استعمال کیے جائیں گے۔آسٹریا نے کہا کہ وہ دوسرے بین الاقوامی شراکت داروں کے ساتھ ایکشن پلان کے نفاذ کی قریب سے نگرانی کرے گا۔الپائن ملک نے کہا کہ اس نے غزہ اور خطے میں مصیبت زدہ فلسطینی آبادی کیلئے امدادمیں خاطر خواہ اضافہ کیا ہے، 32 ملین یورو (34.8 ملین ڈالر) کی انسانی امداد دیگر بین الاقوامی امدادی تنظیموں کے لیے دستیاب ہے۔خیال رہے کہ اسرائیل نے جنوری میں الزام لگایا تھا کہ اقوام متحدہ کی ریلیف اینڈ ورکس ایجنسی (یو این آر ڈبلیو اے) کے چندملازمین نے 7 اکتوبر کو حماس کے حملوں میں حصہ لیا ، جس سے غزہ کی پٹی میں جنگ شروع ہوئی ۔بعد ازاں ، آسٹریا سمیت متعدد ڈونر ریاستوں نے تقریباً 450 ملین ڈالر کی فنڈنگ معطل یا روک دی۔تاہم، جرمنی، سویڈن، کینیڈا اور جاپان سمیت متعدد ممالک نے فنڈنگ دوبارہ شروع کر دی ، جب کہ دیگرنے فنڈنگ جاری رکھی تھی۔