پولیس آرڈر 2002 پر عملدرآمد کیلئے 30 دسمبر کی ڈیڈ لائن

اسلام آباد(جنگ رپورٹر)اسلام آباد ہائی کورٹ نے وفاقی سیکرٹری داخلہ، چیف کمشنر اور آئی جی اسلام آباد کو پولیس آرڈر 2002 پر عملدرآمد کے لیے 30 دسمبر کی ڈیڈ لائن دیتے ہوئے قرار دیا ہے کہ پولیس آرڈر پر عدم عملدرآمد کی صورت میں تینوں افسران آئندہ سماعت پر ذاتی حیثیت میں پیش ہوں،چیف جسٹس اطہر من اللہ پر مشتمل سنگل بنچ نے کیس کی سماعت کی تھی ،ہفتہ کے روز جاری کئے گئے 3 صفحات پر مشتمل تحریری حکم نامہ میں کہا گیا ہے کہ پولیس آرڈر پر سختی سے عملدرآمد کروانا وزارت داخلہ اور اسلام آباد انتظامیہ کی قانونی ذمہ داری تھی ،پولیس آرڈر 2002 اگست 2015 سے نافذالعمل ہے اورایک نافذشدہ قانون پر عملدرآمد نہ کرنا شہریوں کے بنیادی حقوق متاثر کرنے کے مترادف ہے،عدالت نے قرار دیاہے کہ اسلام آباد پولیس کا حالیہ سیٹ اپ بادی النظر میں پولیس آرڈر 2002 سے متصادم ہے، وفاقی حکومت اور اسلام آباد انتظامیہ پولیس آرڈر 2002 پر عملدرآمد میں ناکام کیوں رہی ہیں؟ محکمہ پولیس کے حالیہ نظام کے قانونی ہونے کا کیا جواز پیش کیا جا سکتا ہے ؟عدالت میں پیش ہونے والے افسران پولیس آرڈر پر عملدرآمد کا جواز پیش کرنے میں ناکام رہے ہیں۔