مولانا فضل الرحمٰن کی باتیں قوم سن رہی ہے، لاوا پھٹے گا، شیخ رشید

21 مئی ، 2024

اسلام آباد ( نیوز ایجنسیاں ) سربراہ عوامی مسلم لیگ و سابق وفاقی وزیر داخلہ شیخ رشید احمد نے کہا ہے کہ آئندہ بجٹ میں تنخواہیں پوری کرنا بھی حکومت کے بس کی بات نہیں،آئندہ آنے والا بجٹ آئی ایم ایف کا بجٹ ہے، غریب کا خیال کریں، بجٹ میں17گریڈ تک کے ملازمین کی تنخواہ دگنی کی جائے ورنہ یہ لاوا پھٹے گا، مولانا فضل الرحمان کی باتیں قوم سن رہی ہے ۔عدالت پیشی کے موقع پر میڈیا سے گفتگو کرتے ہوئے انہوں نے کہا کہ اتنے کیسز ہیں ہر روز عدالت میں پیش ہورہے ہیں، مجھے یہ نہیں معلوم کہ یہ کیس کیا ہے ، بعد میں نام ڈالتے رہتے ہیں، جمہوریت گھیراؤ میں ہے اور یہ غیر مقبول حکومت ہے۔انہوں نے کہا کہ مہنگائی اور خاص طور پر بجلی کا بل تباہ کن ہے، بجٹ آرہا ہے اس میں تنخواہیں پوری کرنا بھی ان لوگوں کے بس کی بات نہیں، اس حکومت کی کوئی سن رہا ہے نہ ان کی طرف دیکھ رہا ہے۔