9 مئی، منصوبہ بندی میں جنرل فیض ملوث ہیں، فیصل واوڈا

کراچی (ٹی وی رپورٹ) سابق وفاقی وزیر سینیٹر فیصل واوڈانے جیوکے پروگرام ’’کیپٹل ٹاک‘‘ میں میزبان حامد میرسے گفتگو کرتے ہوئے کہا ہے کہ اپنے دعوے پر قائم ہوں، نو مئی کے واقعات کی منصوبہ بندی میں جنرل فیض ملوث ہیں، جب نو مئی کا کیس کھلے گا تو ثبوت پیش کردوں گا میرے پاس مواد ہے ۔ پروگرام میں تحریک انصاف کے رہنما زین قریشی اور فیصل واوڈا نے اتفاق کیا ہے کہ حکومت اور عدلیہ میں محاذ آرائی کا حل آئین پر عملدرآمد کرنے میں ہے۔ میزبان حامد میر نے بتایا کہ ڈی چوک پر غزہ میں اسرائیلی بمباری کیخلاف دھرنا دینے والے ملازمین پر رات میں گاڑی چلادی گئی جس میں دو افراد شہید ہوگئے، اس واقعہ کی بڑی عجیب و غریب ایف آئی آر درج ہوئی ہے جس میں ملزم کی ولدیت کا ہی پتا نہیں چل رہا ہے، حکومت اس معاملہ کو سنجیدگی سے لے اور پتا کرے یہ شخص کون ہے اور کہاں سے آیا تھا۔ سینیٹر فیصل واوڈا نےکہا کہ مجھے گھما پھرا کر گھسیٹ کر توہین میں لایا گیا ہے، میں نے پاکستانی قوم کو ایسا بیانیہ دیا جو کوئی لیڈر نہیں دے سکتا، جو لوگ بھی بول رہے ہیں وہ پاکستان کی ترقی اور عدلیہ کے وقار کیلئے بات کررہے ہیں، میرے ساتھ پہلے بھی بے انصافی ہوتی رہی اب تو مجھ پر پراکسی کا الزام لگ گیا ہے، اعظم نذیر تارڑ میرے راستے پر چل رہے ہیں تو کیا ان پر بھی توہین لگائیں گے، پی ٹی آئی کے لوگوں نے نام لے کر گالیاں دیں توہین ان پر ہونی چاہئے، میں جو بات کررہا تھا آج پورا پاکستان کہہ رہا ہے۔ فیصل واوڈا کا کہنا تھا کہ ایک حاضر سروس جج اطہر من اللہ نے مجھے پراکسی کہا ہے، انڈین اور انگلش اخباروں نے میری ہیڈ لائنز لگائی ہیں کہ میں پراکسی ہوں، میرے باپ دادا کی عزت کا جنازہ نکال دیا گیا اب ثابت تو کرنا پڑے گا، قانونی طور پر کوئی حاضر سروس جج کسی پر الزام نہیں لگاسکتا، وزیراعظم شہباز شریف، وزیر قانون سمیت پارلیمنٹ پر کوئی شب خون مارا گیا یا ہماری عزت پر حملہ ہوا تو ہم ساتھ کھڑے ہوں گے۔