تبدیلی کا نعرہ دھوکہ ادارے آئینی حدود میں رہیں :پی ڈی ایم

لاڑکانہ( بیورو رپورٹ) پی ڈی ایم رہنمائوں نے کہاہےکہ تبدیلی کا نعرہ دھوکہ،ادارے آئینی حدود میں رہیں، فضل الرحمان نے کہاکہ نیب میرا کیا احتساب کریگا اس کا خود ہونا چاہیے،جعلی کابینہ نے اسٹیٹ بینک کو آئی ایم ایف کے حوالے کرنے کی منظوری دی، جو مسلط کئے گئے ہیں ان کی کوئی حیثیت نہیں، ہم انہیں پہلے ہی مسترد کرچکے ہیں، وہ ہفتے کو رات گئے جے یو آئی کے زیراہتمام میونسپل اسٹیڈیم میں شہید اسلام قومی کانفرنس سے خطاب کررہے تھے، کانفرنس سے ن لیگ کے رہنما شاہد خاقان عباسی، عبدالغفور حیدری ، اویس نورانی اور دیگر رہنمائوں نے بھی خطاب کیا۔ مولانا فضل الرحمن نے کہا کہ عمران خان نے ملکی معیشت کو تباہ و برباد کردیا ہے، روپئے کی قدر میں اتنی گراوٹ کبھی نہیں دیکھی گئی،اب یہ چیلنج درپیش ہے کہ ملک کو کس طرح اپنی ٹانگوں پر کھڑا کیا جائے،پاکستان واحد ملک ہے جس کی سالانہ قومی پیداوار صفر سے بھی نیچے چلی گئی،ہمارا نوجوان بہت مظلوم ہے، اسے دھوکہ دیا گیا، ایک کروڑ نوکریوں کا کہہ کر لوگوں کو بےروزگار کردیا گیا، پچاس لاکھ گھر دینے کا کہہ کر پچاس لاکھ گھر گرا دئیے گئے،آج پارلیمنٹ یرغمال ہے،اگر کوئی قانون سازی ہوتی ہے تو وہ بھی بیرونی آقائوں کے اشارے پر ہوتی ہے،الیکشن میں دھاندلی کے لئے قانون سازی کی جا رہی ہے، ہمیں آج کسی بین الاقوامی قوت کی کالونی نہ بننے کا عزم کرنا ہے، ہم نے اس ملک کی آزادی کے لئے بڑی قربانیاں دی ہیں،70سال سے کشمیریوں کے لئے قربانیاں دیتے آ رہے ہیں مگر موجودہ حکمرانوں نے کشمیر کو بھارت کے حوالے کردیا، سندھ اور بلوچستان کے جزائر کے مالک وہاں کے عوام ہیں،میرا کیا احتساب کرے گا اس کا تو خود احتساب ہونا چاہیے۔ قبل ازیں کانفرنس سے خطاب کرتے ہوئے شاہد خاقان عباسی نے کہا کہ وہ شخصیات کی نہیں اداروں کی بات کریں گے، اداروں کو اپنی آئینی حدود میں رہ کر کام کرنا چاہیے۔ پی ڈی ایم واحد اتحاد ہے جو غریبوں کے مسائل کے لئے بول رہا ہے۔کانفرنس سے خطاب کرتے ہوئے اویس نورانی نے کہا کہ تبدیلی کا نعرہ دھوکے کے سوا کچھ نہیں۔اوورسیز پاکستانیوں کے نام پر ووٹوں پر قبضہ کرنے کی کوشش کی جا رہی ہے۔سابق سینیٹر اور پیپلز پارٹی ورکرز کے صدر ڈاکٹر صفدر عباسی نے کہا کہ عوام کا اتحاد پیپلز پارٹی کو اسی طرح شکست دے سکتا ہے جس طرح ضمنی انتخابات میں لاڑکانہ میں پیپلز پارٹی کو شکست دی۔ یہ کانفرنس سندھ کی سیاست کا نیا رخ متعین کرے گی۔کانفرنس سے عبدالغفور حیدری ، مولانا ہالیجوی اور دیگر نے بھی خطاب کیا۔