صحافیوں کی پلاٹ رجسٹریشن ، RUDAکو آج معلومات پبلک کر نیکا حکم

لاہور(آصف محمود بٹ ) پنجاب انفارمیشن کمیشن نے راوی اربن ڈویلپمنٹ اتھارٹی کو پلاٹوں کے لئے درخواستیں دے کر رجسٹریشن کروانے والے صحافیوں کے اداروں کے نام اور ان کے عہدوں سمیت دیگر معلومات پبلک کرنے کے لئے آج تک کی مہلت دیدی ہے۔جبکہ صحافتی اداروں کے نام ،اپوائنٹمنٹ لیٹر، عہدوں سمیت دیگر معلومات پر استثناء کی درخواست مسترد کردی۔ ’’جنگ‘‘ کو ملنے والی دستاویزات کے مطابق انفارمیشن کمیشن نے فیصل خان بنام چیف ایگزیکٹو آفیسر راوی اربن ڈویلپمنٹ اتھارٹی (روڈا) کیس کی سماعت کے دوران اتھارٹی کے لاء افسر ثاقب ہارون اور اے ڈی پی آ رشیر افضل پیش ہوئے۔ روڈا افسران نے کمیشن کو بتایا کہ پلاٹوں کے لئے اپلائی اور رجسٹریشن کروانے والے صحافیوں کے ناموں کی فہرست راوی اربن ڈویلپمنٹ اتھارٹی کی ویب سائٹ پر اپ لوڈ کر دی گئی ، صحافیوں کے اداروں کے نام جہاں وہ کام کر رہے ہیں، ان کو اداروں کی طرف سے دیئے گئے اپوائنٹمنٹ لیٹر اور ان کے عہدوں سمیت دیگر معلومات افشاء کرنے پر ایک حد تک انہیں استثناء حاصل ہے۔ انفارمیشن کمیشن نے راوی اربن ڈویلپمنٹ اتھارٹی کی طرف سے استثناء کی درخواست مسترد کرتے ہوئے روڈا کو حکم دیا کہ مذکورہ تمام معلومات، صحافیوں کو پلاٹوں کی الاٹمنٹ کیلئے سکروٹنی کمیٹی کے فیصلوں کی تفصیلات اور جن کو پلاٹ دینے کا فیصلہ کیا گیا، ان کی حتمی فہرست شکایت کنندہ فیصل خان کو رائٹ ٹو انفارمیشن ایکٹ کے تحت فراہم کرے۔ اس سے قبل روڈا افسران نے انفارمیشن کمیشن میں پیشی کے دوران استدعا کی تھی کہ شکایت کنندہ کی طرف سے رائٹ ٹو انفارمیشن ایکٹ کے تحت مانگا گیا ریکارڈ بہت زیادہ ہے لہذا انہیں اسے اکٹھا کرنے کے لئے وقت دیا جائے۔ انفارمیشن کمیشن نے رائٹ ٹو انفارمیشن ایکٹ 2013ءکے تحت مذکورہ معلومات قانون کے مطابق 14روز میں پبلک نہ کرنے پر چیف ایگزیکٹو آفیسر راوی اربن ڈویلپمنٹ اتھارٹی کو شوکاز نوٹس بھی جاری کیا تھا۔