غزہ کیمپ مظاہرین پر گاڑی چڑھانے والوں کو سزا ملنی چاہئے، عطاءتارڑ

کراچی (ٹی وی رپورٹ) جیوکے پروگرام ”کیپٹل ٹاک“میں میزبان حامد میر سے گفتگو کرتے ہو ئے وفاقی وزیر اطلاعات عطاء اللہ تارڑ نے کہا ہے کہ غزہ کیمپ کے مظاہرین پر گاڑی چڑھانے والوں کو قرار واقعی سزا ملنی چاہئے، ہتک عزت قانون میں تمام لوگوں کیلئے سپیشل ٹربیونلز بنائے گئے ہیں، تحریک انصاف کے رہنما سینیٹر بیرسٹر علی ظفر نے کہا کہ ترجمان تحریک انصاف رؤف حسن پر حملہ پی ٹی آئی کیلئے ایک وارننگ ہے،صحافی بھی کہہ رہے ہیں اور پی ٹی آئی کا بھی موقف ہے کہ ہتک عزت کا بل کالا قانون ہے۔وفاقی وزیر اطلاعات عطاء اللہ تارڑ نے کہا کہ رؤف حسن پر حملے کی پرزور مذمت کرتا ہوں، سمیع ابراہیم پر بھی خواجہ سرا نے حملہ کیا تھا، میرے حلقے میں پانچ ہزار خواجہ سرا رہتے ہیں، ہم بات کریں گے یہ واقعہ کیوں پیش آیا، انہیں حملہ کرنے کی کیا ضرورت تھی اور کیا وجہ تھی، خواجہ سراؤں کو زیرحراست لے کر تفتیش کی جائے تو کہانی سامنے آجائے گی۔