وارداتیں جاری،شہری لٹتے رہے،مزید 4گاڑیوں،29موٹرسائیکلوں سے محروم

23 مئی ، 2024

راولپنڈی،اسلام آباد (سٹاف رپورٹر،خصوصی نامہ نگار) راولپنڈی کے مختلف علاقوں میں شہری ایک گاڑی 13موٹرسائیکلوں ،موبائل فونز اور نقدی سے محروم ہوگئے ۔ وفاقی دارالحکومت میں بھی 46 وارداتوں میں لاکھوں کی نقدی ،زیورات اور دیگر قیمتی سامان کے علاوہ تین کاریں اور 16 موٹر سائیکل اڑا لئے گئے ۔دریں اثناءوفاقی دارالحکومت میں مختلف واقعات میں 5کروڑ8 لاکھ75ہزار روپے مالیت کے چیک ڈس آنر ہو گئے۔تھانہ صدربیرونی کے علاقہ شاہ پوراڈیالہ روڈ پر محمد امین اپنی فیملی کے ہمراہ جارہاتھاکہ 4ملزم گن پوائنٹ پر اسے روک کر12 ہزار روپے ،شناختی کارڈز،اے ٹی ایم کارڈ، موٹرسائیکل چھین لئے، اسی دوران سید خضر علی شاہ کو روک کر اس سے گن پوائنٹ پر موبائل فون ،ڈیڑھ لاکھ روپے ، شناختی کارڈ، ڈرائیونگ لائسنس چھین کرفرار ہوگئے ۔محلہ حاجیاں میں خواجہ نعیم احمد کے گھر سے 13گرام سونا ،وحدت کالونی میں محمد عثمان کی برفی کی دکان سے سیلز مین ناصر 5لاکھ روپے چوری کرکےلے گیا۔ تھانہ نیوٹاؤن کو محمد جمال ناصر کیانی نے بتایا کہ میں میجر خدیجہ کے ہمراہ کمرشل مارکیٹ آرہا تھا کہ ایک نشئی شخص نے زور سےگاڑی کا دروازہ بجایا جس پر ہم ان کی طرف متوجہ ہوئے تواچانک سے دوسری طرف گاڑی کے ڈیش بورڈ سے ایک اور نشئی شخص نے والٹ نکال لیا ، جس میں 30ہزار روپے اور اے ٹی ایم کارڈ تھا ۔تھانہ رمنا کے علاقے سیکٹر جی ٹین ون ،سٹریٹ نمبر 5 میں ایک موٹر سائیکل سوار واجب زیب کی ہمشیرہ اور اس کی ساتھی لیکچرار سے اسلحہ کی نوک پر گھر کے باہر کھڑی گاڑی سے زیورات اتروا کر چلتا بنا۔تھانہ کورال کے علاقے میں اسد علی خان سے نامعلوم افراد نقدی ،جیولری ، تھانہ لوہی بھیر کے علاقے پاکستان ٹائون میں نامعلوم چور عبدالرشید اور اس کے ساتھیوں کےچھ موبائل فون چور ی کر کے چلتے بنے ۔