کیش لین دین،حوصلہ شکنی کیلئے 5ہزار روپے کا نوٹ منسوخ کیا جائے،بجٹ تجاویز

اسلام آباد( کامرس رپور ٹر ) اوورسیز انویسٹر چیمبرآف کامرس اینڈ انڈسٹری (او آئی سی سی آئی) نے حکومت کو بجٹ تجاویز پیش کر دی ہیں ، او ورسیز چیمبر آف کامرس نے تجویز دی ہے کہ کیش لین دین کی حوصلہ شکنی کے لیے 5 ہزار روپے کا نوٹ منسوخ کیا جائے، بنک اکائونٹ کے لیے این ٹی این نمبر لازمی قراردیا جائے ، گاڑیوں کی خریدو فروخت ، بیش قیمت املاک کی فروخت، غیر ملکی سفیر اور کلبوں کی رکنیت کیلئے بھی این ٹی این لازمی قرار دیاجائے۔ اسی طرح نان فائلرزکے آمدن سے مطابقت نہ رکھنے والے اثاثوں اور آمدن کا پتہ چلانے کےلیے ایف بی آر کا الگ سے ونگ قائم کیاجائے جو سٹیٹ بینک کے مالیاتی نگرانی یونٹ سے مل کر کام کرے۔ 200 ملٹی نیشنل کمپنیوں پر مشتمل غیر ملکی سرمایہ کاروں کی نمائندہ تنظیم او آئی سی سی آئی نے حکومت سے کہا ہےکہ پنشنروں کو دی جانے والے استثنیٰ کو ختم کیا جائے اور ان پربھی ٹیکس لگایا جائے۔ تمام فضائی ٹکٹوں پر انکم ٹیکس لیاجانا چاہیے بالخصوص نان فائلرز سے سے ٹیکس وصولی کی جائے ،اسی طرح ہوٹلنگ اور سفری اخراجات پر بھی ود ہولڈنگ ٹیکس لگانے کی تجویز دی گئی ہے، معیشت میں نقدقوم کی حوصلہ شکنی کی جائے تاکہ دستاویز ی معیشت بن سکے۔ سٹیٹ بینک کے راست ڈیجیٹل پیمنٹ جیسے اقدامات کو اپنایاجائے۔او آئی سی سی آئی نے تجویز پیش کی کہ تمام سیکٹرز کیلئے ڈیجیٹل انوائسنگ لازمی قرارد ی جائے۔ ادائیگیوں کی ڈیجیٹلائزیشن کیلئےفنٹیک، پی او ایس انوائسز ، ای انوائسز ، موبائل والٹس جیسے پلیٹ فارمز کو فروغ دینا چاہیے اس سے حکومت کو ریٹیلرز اور سروس پرووائیڈر کو ٹیکس نیٹ میں لانے میں مدد ملے گی۔