امریکا نے چوری شدہ 133 قدیم نوادرات پاکستان کو واپس کر دیئے

23 مئی ، 2024

اسلام آباد (نامہ نگار خصوصی) امریکا نے13 ملین ڈالر سے زائد مالیت کے چوری شدہ 133 قدیم نوادرات پاکستان کو واپس کر دیئے اس ضمن میں نیویارک میں مین ہٹن ڈسٹرکٹ اٹارنی کے دفتر میں گزشتہ روز تقریب منعقد کی گئی ،جس میں برآمد شدہ بعض نوادرات کی نمائش بھی کی گئی تقریب میں نیویارک میں پاکستانی قونصل جنرل عامر احمد اتوزئی نے حکومت پاکستان کی جانب سے نوادرات وصول کئے انہوں نے ڈسٹرکٹ اٹارنی دفتر ، اسکے نوادرات کے سمگلنگ یونٹ اور محکمہ ہوم لینڈ سکیورٹی کا پاکستان کے چوری شدہ ثقافتی خزانے کی برآمد کی کوششوں پر انکا شکریہ ادا کیااور کہا کہ یہ نوادرات پاکستان بھر کے عجائب گھروں کی زینت بنیں گے ، قونصل جنرل نے مین ہٹن میں اسسٹنٹ ڈسٹرکٹ اٹارنی، میتھیو بوگڈانوس کیساتھ ایک معاہدے پر بھی دستخط کئے جو نوادرات کی سمگلنگ یونٹ کے سربراہ ہیں تاکہ برآمد کئے گئے نوادرات پاکستان کو واپس بھیج سکیں، بوگڈانوس نے کہا کہ وہ پاکستان کو عظیم پاکستانی ورثے کے نمونوں کو واپس کرنے پر بہت خوش ہیں جن کی تہذیب 5000 سال پرانی ہے۔