IMF مذاکرات، گھریلو صارفین کیلئے گیس مزید مہنگی کرنیکی تیاری

اسلام آباد (جنگ نیوز) عالمی مالیاتی فنڈ (آئی ایم ایف) سے مذاکرات، وفاقی حکومت نے گھریلو، کھاد، سی این جی اور سیمنٹ سیکٹر کیلئے گیس مزید مہنگی کرنےکی تیاری شروع کردی۔ذرائع کے مطابق آئی ایم ایف مشن کو گیس سیکٹر کا گردشی قرضہ کم کرنے کیلئے 3 پلان دئیے گئے ہیں، آئی ایم ایف کو فرٹیلائزر پلانٹس کیلئے بھی گیس نرخوں میں اضافے کی تجاویز دی گئی ہیں۔اس کے علاوہ گیس سیکٹر کا گردشی قرضہ کم کرنے کےلیے ڈیویڈنڈ سکیم پر بھی بات کی گئی ہے، وصولیوں، اصلاحات اور ٹیرف سے متعلق ڈیٹا آئی ایم ایف کو بروقت شیئر کرنے پر بھی اتفاق کیا گیا ہے۔ آئی ایم ایف مشن سےگیس سیکٹر کیلئے ٹیرف، گردشی قرض اور ریفارمز پر مذاکرات ہوں گے۔ آئی ایم ایف سے شیئر پلان میں اگست سے گیس نرخوں میں اضافے کی تجویز ہے، پروٹیکٹڈ اور نان پروٹیکٹڈ صارفین کیلئے بل 100 سے 400 روپے تک بڑھانے کی تجویز ہے۔جبکہ آئی ایم ایف سے شیئر پلان کے مطابق تندوروں کیلئے گیس نرخوں میں اضافہ نہ کرنے کی تجویز ہے۔