انتخابی عمل کو مضبوط بنانے میں عالمی اداروں کا تعاون لائق تحسین ، عطاءاللہ تارڑ

اسلام آباد (نمائندہ خصوصی)وفاقی وزیر اطلاعات، نشریات، قومی ورثہ و ثقافت عطاءاللہ تارڑ نے کہا ہے کہ سوشل میڈیا کے عروج نے سیاسی مصروفیات کو نئی شکل دی ہے، موجودہ ڈیجیٹل دور میں جہاں ڈیجیٹل پر مبنی حکمت عملیوں کی راہ ہموار ہو رہی ہے وہاں فیک نیوز، مس انفارمیشن اور ڈس انفارمیشن کے چیلنجز بھی درپیش ہیں۔ یہ بات انہوں نے بدھ کو یہاں اقوام متحدہ کے انتخابی ضروریات کے جائزہ مشن سے ملاقات کے دوران گفتگو کرتے ہوئے کہی۔ وفاقی وزیر اطلاعات نے اقوام متحدہ کے جائزہ مشن کی جانب سے پاکستان میں انتخابات کی شفافیت کے لئے خدمات کو سراہا۔ انہوں نے کہا کہ پاکستان میں انتخابی عمل کو مضبوط بنانے کے لئے عالمی اداروں کا تعاون لائق تحسین ہے۔انہوں نے کہا کہ الیکشن کمیشن آف پاکستان موجودہ دور کے تقاضوں کے مطابق ڈیجیٹل محاذ پر کام کر رہا ہے،انتخابی عمل میں ووٹرز کو آگاہی فراہم کرنا انتہائی ضروری ہے۔ وفد میں پولیٹیکل افیئرز افسران ہیسام منکارا، ادتیہ ادھیکاری، یو این ڈی پی ریجنل ایڈوائزر ناجیاہاشیمی، چیف ٹیکنیکل ایڈوائزر یو این ڈی پی میری کیومنز، پروگرام ایڈوائزر یو این ڈی پی محمد قاسم جنجوعہ شامل تھے۔