PTIوفد کی فضل الرحمٰن سے ملاقات، بات چیت اچھی رہی، سربراہ JUI

اسلام آباد (نامہ نگار خصوصی) اپوزیشن جماعتوں کے اتحاد کے وفدنے گذشتہ روز عمر ایوب کی قیادت میں جے یو آئی کے سربراہ مولانا فضل الرحمان سے ملاقات کی جس میں ملک کی سیاسی صورحال پر گفتگو اور بطور اپوزیشن مل کر آگے چلنے پر غور کیا گیا ، تحریک انصاف اور جمعیت علمائے اسلام نے مستقبل میں رابطوں کو جاری رکھنے پر اتفاق کیا ،ملاقات کے بعد میڈیا سے گفتگو کرتے ہوئے مولانا فضل الرحمان نے کہا کہ عمر ایوب اور اسد قیصر سمیت وفد ملاقات کے لیے آیا،بات چیت اچھی رہی ، ان کی سوچ ہے کہ اپوزیشن کے مابین رابطے رہیں ، مشترکہ مؤقف لینے کے لیے ان سے ہمارا کوئی اختلاف نہیں، تلخیوں کو دور کرنے کی ضرورت ہے، ملک میں آئین پاکستان کی کوئی حیثیت نہیں رہی، پارلیمنٹ اپنی اہمیت کھوچکی ہے، جمہوریت ہار رہی ہے، عمر ایوب نے کہا آج بڑی مثبت گفتگو ہوئی ہے، ہم چاہتے ہیں جے یو آئی تحریک تحفظ آئین پاکستان کے تحت جدوجہد جاری رکھے، بانی پی ٹی آئی عمران خان کی بھی یہی خواہش ہے، مستقبل میں بھی بات چیت ہوگی ، اسد قیصر نے کہا کہ مولانا فضل الرحمان سے مشترکہ مسائل پر بات چیت ہوئی ہے، اس وقت ملک میں آئین معطل ہے، بنانا ری پبلک بنادیا گیا ہے، ہماری جنگ کسی کو لانے کی نہیں قانون کی عملداری کی ہے، آئین اور قانون کی حکمرانی سے ملک ترقی کرے گا۔