فارم 45 کی موجودگی میں نئے الیکشن کی ضرورت نہیں، عوامی مینڈیٹ بحال کیا جائے، حافظ نعیم

لاہور(نمائندہ جنگ)امیر جماعت اسلامی حافظ نعیم الرحمٰن نے کہا ہے فارم 45کے ہوتے ہوئے نئے الیکشن کی ضرورت نہیں، جوڈیشل کمیشن بنے، عوامی مینڈیٹ بحال ہو، تمام سیاسی قیدیوں کو رہا کیا جائے۔ دبئی لیکس کو دبایا جارہا ہے، ملوث افراد منی ٹریل دیں، سپریم کورٹ، الیکشن کمیشن جواب طلبی کرے، کونسا اخلاقی جواز ہے حکمران ٹولہ خود باہر دولت بھیجے اور ملک میں سرمایہ کاری کے بھاشن دے۔ منصورہ میں پریس کانفرنس سے خطاب کرتے ہوئے امیر جماعت نےکہاکہ پی ٹی آئی رہنما رؤف حسن پر حملہ کی مذمت کرتے ہیں، ایسے حربے ملک کیلئے نقصان دہ ہیں، سب کو آئینی پوزیشن پر واپس آنا پڑے گا، چادر چاردیواری کا تحفظ بحال ہونا چاہئے۔ اسلام آباد میں غزہ کیمپ پر حملہ اور دوافراد کی شہادت میں ملوث شخص اور واقعہ کی شفاف تحقیقات کا مطالبہ کرتے ہیں۔ فلسطین میں جاری مظالم کے خلاف جاندارانہ موقف اپنانا پاکستان کی ذمہ داری ہے، حکومت حماس کو اہل فلسطین کی جمہوری اور نمائندہ تنظیم کے طور پر تسلیم کرے۔ پنجاب میں تعلیم کی پرائیو یٹائزیشن کے عمل کو مسترد کرتے ہوئے کہا کہ شہریوں کو تعلیم، صحت اور دیگر بنیادی سہولتوں کی فراہمی آئین پاکستان کے تحت ریاست کی ذمہ داری ہے۔ ن لیگ گزشتہ چالیس برس سے حکومت میں ہے، جواب دے کہ ایجوکیشن سیکٹر کی بہتری کیلئے کیا کام کیا۔ سندھ میں بھی سرکاری سکولوں کا برا حال ہے۔ چچا اور بھتیجی کسانوں سے گندم خریدنے کا وعدہ کرکے مکر گئے، سکولوں سے جان چھڑائی جارہی ہے۔