پیپلز پارٹی کے زیر اہتمام آزاد کشمیر بھر میں استحکام پاکستان ریلیاں

مظفرآباد (آئی ا ین پی) پیپلز پارٹی آزادکشمیر نے جمعرات کو ریاست بھر میں استحکام پاکستان ریلیاں نکالیں۔ مظفرآباد میں چھتر سے دربار سہیلی سرکار تک ریلی نکالی گئی، اس دوران فضاء پاکستان زندہ باد کے نعروں سے گونج اٹھی، شرکاء نے پاکستان اور آزادکشمیر سمیت پارٹی پرچم بھی اٹھا رکھے تھے، ریلی کی قیادت سپیکر چوہدری لطیف اکبر نے کی۔ مظفرآباد ڈویژن میں بھی استحکام پاکستان ریلیوں کا انعقاد کیا گیا، ریلی میں وزیر حکومت جاوید ایوب، قاسم مجید، مبارک حیدر، جہانگیر مغل، شجاعت کاظمی و دیگر پارٹی قائدین اور کار کنوں نے بڑی تعداد میں شرکت کی۔ اس موقع پر ریلی سے خطاب کرتے ہوئے قائدین نے کہا کہ پاکستان سے الحاق کشمیریوں کی منزل ہے۔ کشمیریوں نے استحکام پاکستان اور نظریاتی و جغرافیائی سرحدوں کی حفاظت کیلئے پہلے بھی قربانیاں دیں، آئندہ بھی یہ تسلسل جاری رہے گا، آزادکشمیر میں انتشار پھیلانا دشمن کے ایجنڈے کو تقویت دینے کے مترادف ہے۔ انہوں نے کہا کہ بیس کیمپ میں مضبوط سیاسی جمہوری حکومت عوام کی فلاح وبہبود مسائل کے حل اور تعمیر و ترقی کیلئے تمام وسائل بروئے کار لا رہی ہے، پاکستان اور کشمیر کے لازوال رشتے کو کمزور کرنے کی خواہشات رکھنے والوں کو ہمیشہ ناکامی ہوگی۔