20 دن میں روپے کی قدر میں6 روپے 2پیسے کی کمی ہوئی، شیری رحمٰن

28 نومبر ، 2021

اسلام آباد (صباح نیوز) سینیٹ میں پاکستان پیپلز پارٹی کی پارلیمانی لیڈر اور سینیٹ قائمہ کمیٹی برائے خارجہ امورکی چیئرپرسن شیری رحمٰن نے کہا ہے کہ بیس دن میں روپے کی قدر میں 6 روپے دو پیسے کی کمی ہوئی ،روپے کی غیر مستحکم صورتحال معیشت کے لئے تباہ کن ہے۔ ان خیالات کااظہار شیری رحمٰن نے ہفتہ کے روز اپنے بیان میں کیا۔ شیری رحمان نے کہا کہ پی ٹی آئی ایم ایف کے تحت ایک اور ریکارڈ ٹوٹ گیا، پاکستانی روپے کی قدر گزشتہ20روز کے دوران ریکاڑد چھ روپے20پیسے کم ہوئی ہے۔ 2018سے اب تک امریکی ڈالر کے مقابلہ میں پاکستانی روپے کی قدر میں 50روپے سے زائد کمی آئی ہے۔ اس میں کوئی حیرانی کی بات نہیں کہ پاکستان کا کل قرضہ اورواجب الادا ادائیگیاں رواں ہفتے بڑھ کر 50ہزار50ارب روپے تک پہنچ گئی ہیں۔شیری رحمٰن نے کہا کہ معیشت وینٹی لیٹرپر ہے تاہم حکومت کہتی ہے کہ پریشانی کی کوئی بات نہیں، مارکیٹ میں بے اعتمادی اور روپے کی غیر مستحکم صورتحال معیشت کے لئے تباہ کن ہے، معیشت کی ایسی غیر یقینی کی صورتحال تاریخ میں نہیں دیکھی،معیشت کا دیوالیہ ہو چکا لیکن آپ نے گھبرانا نہیں۔