3سالوں میں ملک کو اندھیروں میں دھکیل دیا :نواز شریف

سرگودھا(نامہ نگار)سابق وزیر اعظم نواز شریف نے کہا ہے کہ نااہل حکمرانوں نے ملک کو تجربہ گاہ میں تبدیل کردیا ہے، تین سالوں کے دوران ملک کو اندھیروں میں دھکیل دیا گیا ہے جس قدر مسائل عمران خان نے ملک و قوم کیلئے پیدا کردیئے ہیں گزشتہ 70 سالوں میں ملک پر یہ حالات کبھی بھی نہیں آئے۔انہوں نے یہ بات سرگودھا سے تعلق رکھنے والے مسلم لیگ ن کے رکن پنجاب اسمبلی ڈاکٹر لیاقت علی خان سے گفتگو کرتے ہوئے کہی ، ڈاکٹر لیاقت علی خان نے لندن میں سابق وزیر اعظم نواز شریف سے ملاقات کی ہے جس میں پاکستان کے سیاسی و معاشی حالات زیر بحث آئے۔اس موقع پر نواز شریف نے مزید کہا کہ نت نئے تجربے کرکے عوام پر جو ظلم کے پہاڑ ڈھائے جارہے ہیں اس کے ازالہ کیلئے حکمران جماعت کو آئندہ الیکشن میں امیدوار بھی نہیں ملیں گے ۔ انہوں نے کہا کہ انشاء اللہ آئندہ انتخابات میں پاکستان مسلم لیگ ن بھاری اکثریت سے کامیابی حاصل کریگی کیونکہ عوام کو بخوبی معلوم ہے کہ ان کی داد رسی کس نے کرنی ہے ،انہوں نے کہا کہ اس حکومت کے خاتمہ کیلئے عوام میں بڑھتا ہوا جوش ثابت کررہا ہے کہ اس گرتی ہوئی دیوار کو ایک دھکا اور دو تاکہ اس نااہل حکومت سے عوام کی جان چھوٹ سکے اس موقع پر ڈاکٹر لیاقت علی خان نے میاں محمد نواز شریف کو سٹی سرگودھا کے حوالے سے اپنی کارکردگی کے بارے میں آگاہ کیا اور کہا کہ جس طرح شہر اور گاؤں میں عوام کی جانب سے مسلم لیگ ن کو پذیرائی مل رہی ہے آئندہ انتخابات میں پاکستان تحریک انصاف کو منہ کی کھانا پڑیگی۔