اسلام آباد، پی ٹی آئی جلسے میں نامعلوم شخص کا سٹیج کے مائیک پر عمران خان کے استعفے کا مطالبہ

اسلام آباد(جنگ نیوز)اسلام آباد میں پاکستان تحریک انصاف (پی ٹی آئی) کے جلسےکے اختتام پرنامعلوم شخص نے مائیک پر وزیراعظم عمران خان کے استعفے کا مطالبہ کردیا۔اسلام آباد میں پی ٹی آئی کے جلسے میں وفاقی وزیر اسد عمر، علی نواز اعوان اور راجا خرم شہزاد نے خطاب کیا۔ان رہنماؤں کے خطاب کے بعد ایک شخص اسٹیج پر چڑھ آیا، مائیک سنبھالا اور پیش گوئی کردی کہ سب کچھ ویسا ہی ہوگا جیسا راجا خرم شہزاد نےکہا، پر وزیراعظم عمران خان نہیں ہوں گے۔اس شخص نے مزید کہا کہ عمران خان آج استعفیٰ دے دیں تو بہتر ہے، نو عمران اونلی عوام۔ اس موقع پر شرکا ءنے حیرت کا اظہار بھی کیا اور اسٹیج پر موجود منتظمین نے مائیک ہٹا کر اسے مزید بات کرنے سے روک دیا۔