15 سال سے عوام ایک ہی تقریر سن رہے ہیں ‘ مریم اورنگزیب

اسلام آباد (آئی این پی) مسلم لیگ (ن) کی ترجمان مریم اورنگزیب نے کہا ہے کہ 15 سال سے عوام ایک ہی تقریر سن رہے ہیں ۔ تقریر نہیں تو کیسٹ ہی بدل لیں‘ کورونا ریلیف فنڈ کے 40 ارب، 400 ارب کی چینی، غریبوں کی دوائیاں کھا گئے اور صرف کنٹینر کی گفتگو۔ خود عوام کی چینی آٹا کھاؤ اور عوام تقریریں کھائیں ، خود بجلی گیس اور کورونا فنڈ کے پیسے کھاؤ اور عوام تقریریں کھائے؟ عمران صاحب اور کرائے کے ترجمان مریم نواز کے بخار میں مبتلا ہیں۔ واحد حکومت ہے عمران صاحب خود اور کرائے کے ترجمانوں کو کنٹینر سے اترنے نہیں دے رہے۔ اتوار کو وزیر اطلاعات فواد چوہدری کے بیان پر ردعمل دیتے ہوئے مسلم لیگ (ن) کی ترجمان مریم اورنگزیب نے کہا کہ 15 سال سے عوام ایک ہی تقریر سن رہی ہے، تقریر نہیں تو کیسٹ ہی بدل لیں۔ عوام کے پاس روٹی پکانے کے لئے گیس نہیں۔