آڈیوز ویڈیوز ایک ہی فاؤنڈری سے نکلتی ہیں، حسان خاور

لاہور(خبر نگار)معاون خصوصی وزیر اعلیٰ پنجاب حسان خاور نے کہا ہے کہ یہ آڈیوز ویڈیوز ایک ہی فاؤنڈری سے نکلتی ہیں ۔ میڈیا سے گفتگو کرتے ہوئے انہوں نے کہا سیاسی مقاصد کیلئے آڈیو ویڈیو لیکس کا استعمال پرانی روایت ہے جو برسوں سے چلی آ رہی ہے۔ لیکن ان آڈیو ویڈیوز کے تخلیق کار انہیں کمرہ عدالت میں لے جانے سے گھبراتے ہیں کیونکہ وہ انہیں ثابت نہیں کر سکتے۔ وہ صرف اتنا چاہتے ہیں کہ ان ویڈیوز کی آڑ میں اتنی گرد اڑائیں کی ان کی کرپشن چھپ جائے لیکن کرپشن اتنی زیادہ ہے کہ چھپ نہیں سکتی۔ انہوں نے کہا کہ یہ آڈیوز ویڈیوز ایک ہی فاؤنڈری سے نکلتی ہیں، ایک ہی کاریگر کے فن پارے ہیں۔ آپ چاہیں تو اسے "اتفاق" بھی کہہ سکتے ہیں۔ حسان خاور نے مقامی ہوٹل میں مختلف تعلیمی اداروں کی طالبات کیلئے منعقدہ میڈیا ٹریننگ ورکشاپ سے خطاب کرتے ہوئے طالبات کی حوصلہ افزائی کی اور کہا کہ میڈیا انڈسٹری میں ان کا اہم کردار ہے۔