لوڈ شیڈنگ کیخلاف پاکستان مرکزی مسلم لیگ کے زیر اہتمام مظاہرہ

کوئٹہ(اسٹاف رپورٹر)پاکستان مرکزی مسلم لیگ کے زیراہتمام پیر کو صوبائی رہنماء حضور بخش بنگلزئی کی قیادت میں بجلی کی قیمتوں میں اضافے اور لوڈ شیڈنگ کے خلاف کوئٹہ پریس کلب کے سامنے مظاہرہ کیا گیا ، اس موقع پر مظاہرین نے بینرز اور پلے کارڈ اٹھا رکھے تھے اور مطالبات کے حق میں نعرے بازی کررہے تھے ، مظاہرین سے خطاب کرتے ہوئے حضور بخش بنگلزئی و دیگر نے کہا کہ بجلی کے بھاری بھرکم بلوں اور طویل لوڈشیڈنگ نے شہریوں کی زندگی اجیرن بنادی ہے ، کوئٹہ سمیت بلوچستان بھر میں بجلی کی طویل غیراعلانیہ لوڈشیڈنگ کے باعث کاروبار سمیت دیگر امور ٹھپ ہوکر رہ گئے ہیں ، شدید گرمی میں بلوچستان کے گرم علاقوں میں بجلی کی عدم فراہمی سے وہاں کے لوگوں کو شدید مشکلات کا سامنا ہے ، ایک جانب بجلی نہیں دوسری جانب بھاری بھرکم بل بھیجے جارہے ہیں جس کی وجہ سے عوام میں شدید بے چینی پائی جاتی ہے ۔ انہوں نے مطالبہ کیا کہ حکومت بجلی کے بھاری بھرکم بلوں کا نوٹس لیکر عوام کو ریلیف دئے ۔