بانی پی ٹی آئی اور دیگر آزادی مارچ اور توڑ پھوڑ کے مقدمہ سے بری

اسلام آباد (خبر نگار) جوڈیشل مجسٹریٹ اسلام آباد ملک عمران نے آزادی مارچ کے حوالے سے درج مقدمہ میں بانی پی ٹی آئی، شیخ رشید احمد، شاہ محمود قریشی، علی نواز اعوان، صداقت عباسی اور دیگر کی بریت کی درخواستیں منظور کر لیں۔ سماعت کے دوران فاضل عدالت نے پی ٹی آئی رہنمائوں کی درخواست بریت پر محفوظ فیصلہ سنایا۔ بانی پی ٹی آئی عمران خان، شیخ رشید اور دیگر پر دفعہ 144 کی خلاف ورزی، توڑ پھوڑ کی دفعات کے تحت 2022 میں تھانہ آئی نائن میں مقدمہ درج کیا گیا تھا۔ علاوہ ازیں 9 مئی واقعہ پر احتجاج اور توڑ پھوڑ کے درج مقدمہ میں پی ٹی آئی رہنما شہریار خان آفریدی اور دیگر کو بری کر دیا گیا۔ سماعت کے دوران عدالت نے محفوظ فیصلہ سنایا۔ پی ٹی آئی رہنما شہریار آفریدی اور کارکنان پر 9 مئی کو جلاو گھیراو اور توڑ پھوڑ کی دفعات کے تحت تھانہ آئی نائن میں مقدمہ درج کیا گیا تھا۔