ہرنائی:موٹر سائیکل چھیننے کے دوران مزاحمت پر نوجوان کو گولی مار دی گئی

ہرنائی( نامہ نگار ) موٹرسائیکل چھیننے کے دوران نوجوان کی جانب سے مزاحمت پر مسلح ڈاکوؤں نے اس کو گولی مار دی اور اس کی موٹرسائیکل،موبائل فون اور نقدی لیکر فرار ہوگئے۔ اطلاع ملنے پر پولیس محکمہ صحت کے ایمبولینس کے ساتھ جائے وقوع پر پہنچی اور لاش کو ضلعی ہیڈکوارٹر ہسپتال منتقل کیا۔ جہاں ضروری کاروائی کے بعد ورثاء کے حوالے کر دی گئی۔ لواحقین اور ہرنائی عوام نے نوجوان کی لاش کو پولیس تھانہ کے سامنے رکھ کر احتجاجی دھرنا دیا ۔شہر کے تمام کاروباری مراکز بند ہو گئے اور تاجر زمیندار قبائلی عمائدین وعلماء سول سوسائٹی، سیاسی جماعتوں کے عہدیداران احتجاجی دھرنے میں پہنچ گئے۔ ڈپٹی کمشنر ہرنائی عارف خان کاکڑ ایس پی ہرنائی نے لواحقین اور قبائلی عمائدین پر مشتمل کمیٹی سے طویل مذکرات کئے اور نوجوان کے لواحقین اور قبائلی عمائدین نے قاتلوں کی چوبیس گھنٹے کے اندر گرفتاری کی یقین دہانی پر احتجاج ختم کیا اور لاش کو گھر منتقل کیا۔ اس موقع پر ڈپٹی کمشنر ہرنائی عارف خان کاکڑ نے بات چیت کرتے ہوئے کہا کہ قاتلوں کو چوبیس گھنٹے کے اندر گرفتار کرینگے، پولیس، اے ٹی ایف، لیویز، کیو آر ایف لیویز کی چھاپہ مار ٹیم تشکیل دی گئی ہے جلد قاتلوں تک پہنچ جائینگے۔