نوازشریف کا اے سی اتروانے والے مظلومیت کارڈ مت کھیلیں ،عظمیٰ بخاری

لاہور ( این این آئی) وزیر اطلاعات پنجاب عظمیٰ بخاری نے کہا ہے کہ میاں نوازشریف کا اے سی اتروانے والے آج مظلومیت کارڈ مت کھیلیں۔لیگی رہنما کا کہنا تھا کہ عمران خان اور بشریٰ بی بی کے لئے تمام وہ سہولیات میسر ہیں جو وی وی آئی پی کو ملتی، میاں نوازشریف کا اے سی اتروانے والے آج مظلومیت کارڈ مت کھیلیں۔عظمیٰ بخاری نے مزید کہا کہ میاں نوازشریف نے کہہ دیا ہے میری طرف سے یہ دو اے سی لگوائیں مجھے ان میں کوئی دلچسپی نہیں، مسلم لیگ (ن) کی لیڈرشپ انتقام کی سیاست پر یقین نہیں رکھتی، بانی پی ٹی آئی اور بشری بی بی اپنی چوریوں کی وجہ سے آج جیل میں ہیں۔رہنما پی ٹی آئی بیرسٹر سیف کے بیان پر ردعمل دیتے ہوئے انکا کہنا تھا کہ عمران خان جیل میں بادام، پستے، کاجو، کافی اور دیسی مرغی سے مستفید ہو رہے ہیں، عمران خان کے لئے 6 سیل الگ سے خالی کرائے گئے ہیں۔انہوں نے کہا کہ 8ماہ میں بانی پی ٹی آئی نے 288افراد سے ملاقاتیں کیں، عمران خان سے ان کی فیملی اور ان کے وکلا ہفتے میں تین تین دن ملاقاتیں کرتے ہیں، میاں نوازشریف سے صرف ہفتے میں ایک دن جمعرات کے روز ہی ملاقات کی اجازت ہوتی تھی۔