پاکستانی قوم ہر سطح پر اپنے کشمیری بھائیوں کیساتھ کھڑی ہے، پاکستانی سینیٹرز

لندن (آئی این پی) سینیٹ میں قائد ایوان شہزاد وسیم کی قیادت سینیٹرز نے کہا ہے کہ پاکستانی قوم ہر سطح پر اپنے کشمیری بھائیوں کے ساتھ کھڑی ہے، اوورسیز کشمیری و پاکستانی کمیونٹی نے عالمی سطح پر مسئلہ کشمیر کو اجاگر کرنے کے لیے موثر کردار ادا کیا ہے۔تفصیلات کے مطابق قائد ایوان سینیٹر شہزاد وسیم کی قیادت میں سینیٹ وفد نے لندن میں پاکستانی ہائی کمشنر معظم احمد خان، کشمیر پارلیمنٹری گروپ کے سیکرٹری لارڈ قربان حسین، جموں وکشمیر تحریک حق خودارادیت انٹرنیشنل کے چیئرمین راجہ نجابت حسین سے ملاقات کی۔ ملاقات میں پاکستان کے دیگر امور کے علاوہ کشمیر کی صورتحال اور بین الاقوامی سطح پر کشمیریوں کے حق میں اقدامات پر تفصیلی تبادلہ خیال کیا گیا۔ اس موقع پر پاکستانی سینیٹرز قائد ایوان سینیٹ سینیٹر شہزاد وسیم، سینیٹر ڈاکٹر زرقا سہروردی تیمور، سینیٹر دنیش کمار، سینیٹر فوزیہ ارشد اور سینیٹر ثمینہ ممتاز زہری نے کہا کہ مسئلہ کشمیر کے حل کے لیے دنیا کو موثر اقدامات اٹھانے ہوں گے، معصوم اور نہتے کشمیری آئے روز بھارتی درندگی کا شکار ہو رہے ہیں۔