طبی آلات پر سیلز ٹیکس کی چھوٹ ختم کرنا درست نہیں،ڈاکٹر ندیم

کراچی (ٹی وی رپورٹ) جیو کے پروگرام ”آج شاہزیب خانزادہ کے ساتھ“ میں گفتگو کرتے ہوئے معروف کارڈیالوجی ڈاکٹر ندیم رضوی نے کہا ہے کہ اسٹنٹس، پیس میکر اور دل کے امراض کے تحفظ کیلئے درآمد کیے جانے والے طبی آلات پر سیلز ٹیکس کی چھوٹ ختم کرنا درست فیصلہ نہیں ہے،کرکٹر احمد شہزاد نے کہا کہ پاکستان کا ٹی ٹوئنٹی ورلڈکپ سے باہر ہونا بدقسمتی نہیں ہے، پاکستان کرکٹ ٹیم کی پچھلے ڈھائی تین ماہ کی کارکردگی سب کے سامنے ہے، پاکستان ٹیم کو اس طرح چلایا جارہا ہے جیسے گھر کی ٹیم ہو، پاکستان کرکٹ ٹیم میں میرٹ کا قتل عام کیا گیا،سابق کرکٹر سکندر بخت نے کہا چیئرمین پی سی بی محسن نقوی نے دو غلطیاں کیں جس کا نتیجہ سامنے آگیا ہے۔ ڈاکٹر ندیم رضوی نے کہا کراچی اور اندرون سندھ میں بیس ہزار ہارٹ اٹیک کی انجیو پلاسٹی ہوتی ہے جس میں کم از کم ایک سے دو اسٹنٹس لگتے ہیں، ان آلات پر ٹیکس لگانے کا مطالبہ زندگیوں کے تحفظ پر ٹیکس لگانا ہے۔کرکٹر احمد شہزاد نے کہا ٹی ٹوئنٹی ورلڈکپ میں اچھی ٹیموں نے اگلے مرحلہ کیلئے کوالیفائی کیا ہے، چھ آٹھ کے ٹولے پر کریک ڈاؤن کرنے کا وقت آگیا ہے، اس ٹولے کو کم از کم دو سال کیلئے ڈومیسٹک کرکٹ کھیلنے کیلئے بھیجا جائے، اس ٹولے کے ساتھ ایسا سلوک کرنا چاہئے کہ آئندہ کوئی بھی ٹیم کو ہائی جیک کرنے سے گھبرائے، بالکل نئی ٹیم بنائی جائے، پی سی بی کو بلیک میل کر کے اپنی تنخواہیں ساٹھ ساٹھ لاکھ کروالیں ان کے سینٹرل کانٹریکٹ پر نظرثانی کی ضرورت ہے۔سابق کرکٹر سکندر بخت نے کہا چیئرمین پی سی بی نے ایسا کوچ اپائنٹ کیا جو ٹیم کے ساتھ ہی نہیں تھا جبکہ سلیکٹرز کا چناؤ بھی درست نہیں تھا، چیئرمین پی سی بی کو کھلاڑیوں سے ملاقات نہیں کرنی چاہئے، محسن نقوی جتنا کھلاڑیوں سے ملیں گے ان کی عزت ختم ہوتی جائے گی۔ بابرا عظم کو کپتانی سے ہٹانا پڑے گا، ڈومیسٹک کرکٹ میں اچھی کارکردگی دکھانے والے کھلاڑیوں کو ٹیم میں شامل کیا جائے۔نمائندہ جیو نیوز شبیر ڈار نے کہا کہ عمران خان کا کہنا ہے کہ مذاکرات کے حوالے سے غلط بیانی نہ کی جائے، ہم نے سابق چیف جسٹس عمر عطا بندیال کے کہنے پر اس وقت پی ڈی ایم سے مذاکرات کیے تھے، لیکن اس وقت کہا گیا کہ جب تک جسٹس عمر عطا بندیال چیف جسٹس ہیں الیکشن نہیں ہوں گے، بانی پی ٹی آئی کا کہنا تھا کہ ہم مذاکرات سے انکار نہیں کررہے ہیں لیکن اوپر سے احکامات آئیں گے تو پھر مذکرات کا کوئی فائدہ نہیں ہوگا، اگر کوئی پارٹی میں گروپنگ کرتا ہے تو اسے پارٹی سے باہر نکال دیا جائے گا۔ میزبان شاہزیب خانزادہ نے پروگرام میں تجزیہ پیش کرتے ہوئے کہا چیف جسٹس لاہور ہائیکورٹ ملک شہزاد احمد نے راولپنڈی میں تقریب سے خطاب کرتے ہوئے کہا کہ ایک جج کی شکایت سامنے آئی ہے جس میں جج نے مداخلت کے سارے واقعات بیان کیے ہیں، عدلیہ کو اس مداخلت کا سامنا آنکھوں میں آنکھیں ڈال کر کرنا ہے۔