افغانستان میں عدم استحکام سے ہمسایہ ممالک زیادہ متاثر ہوں گے،صدر علوی

اسلام آباد (نمائندہ خصوصی )صدر مملکت ڈاکٹر عارف علوی نے دورہ ترکمانستان کے موقع پر تاجکستان کے صدر امام علی رحمنٰ کے ساتھ ملاقات کی ہے۔ اتوار کو جاری بیان کے مطابق ملاقات کے دوران صدر مملکت ڈاکٹر عارف علوی نے کہا کہ پاکستان اور تاجکستان کے درمیان مضبوط معاشی شراکت داری کیلئے تجارتی اور سرمایہ کاری کے روابط كو مزید فروغ دینے کی ضرورت ہے۔اس موقع پر دونوں رہنماؤں نے کاسا 1000 منصوبے پر عمل درآمد کا جائزہ بھی لیا۔ صدر مملکت ڈاکٹر عارف علوی نے پاکستان کی بندرگاہوں کے ذریعے تاجکستان کیلئے علاقائی انضمام اور روابط پر روشنی ڈالی، دونوں رہنماؤں نے پاکستان اور تاجکستان کو افغانستان میں انسانی صورتحال کی وجہ سے درپیش چیلنجز کے حوالے سے بھی گفتگو کی۔ صدر مملکت ڈاکٹر عارف علوی نے کہا کہ ہمسایہ ممالک افغانستان میں عدم استحکام سے سب سے زیادہ متاثر ہوں گے۔انہوں نے تاجکستان کے صدر کو افغانستان میں امن و استحکام کیلئے پاکستان کی کوششوں کے بارے میں آگاہ کیا۔ صدر مملکت نے کہا کہ افغان معیشت کو بچانے کیلئے افغانستان کے منجمد اثاثے غیر منجمد کرنے کی ضرورت ہے۔