بدترین حکمرانوں نے قوم کو مہنگائی ملک کو قرضوں میں جکڑ دیا،رانا مشہود

خانیوال (نمائندہ جنگ) مسلم لیگ ن صوبہ پنجاب کے نائب صدر اور سابق صوبائی وزیر تعلیم رانا مشہود احمد خاں نے کہا ہے کہ میاں نواز شریف کی ملک و قوم کے لیے خدمات کو کبھی فراموش نہیں کیا جا سکتا، حکومت جتنے چاہے انتقامی ہتھکنڈے استعمال کر لے مسلم لیگ ن کے رہنما اور کارکن کسی قربانی سے دریغ نہیں کریں گے، وہ گزشتہ روز مسلم لیگی رہنما اور وائس چیئرمین بلدیہ رانا عبد الرحمٰن کی رہائش گاہ پر ضمنی الیکشن صوبائی حلقہ 206 کے بارے میں ہائی پروفائل اجلاس سے خطاب کر رہے تھے، اس موقع پر سابق صوبائی وزیر حاجی عرفان ڈاہا ،مسلم لیگ ن کے ڈویژنل صدر عبدالرحمان کانجو، امیدوار ن لیگ رانا محمد سلیم خاں، رانا عرفان محمود اور دیگر شخصیات موجود تھیں، رانا مشہود نے مزید کہا کہ نواز شریف کی آئینی حکومت کو ختم کر کے بدترین حکمرانوں کو مسلط کیا گیا جنہوں نے قوم کو مہنگائی اور ملک کو قرضوں میں جکڑ دیا ہے۔