زیر تعمیر ماڈل بازاروں کو جلد مکمل کرنے کی ہدایت

29 نومبر ، 2021

لاہور(اپنے نامہ نگار سے) سیکرٹری انڈسٹری واصف خورشید نے سی ای او ماڈل بازار مینجمنٹ کمپنی کو زیر تعمیر ماڈل بازاروں کو جلد مکمل کرنے کی ہدایت جاری کر دی۔ پنجاب کے مختلف شہروں میں 32 ماڈل بازار عوام کو سہولیات فراہم کر رہے ہیںجن کی مقبولیت دیکھتے ہوئے حکومت نے ڈسٹرکٹ ہیڈ کوارٹرز میں 17 مزید سٹیٹ آف دی آرٹ ماڈل بازار قائم کرنے کیلئے مقامات کا انتخاب کر لیا ہے ۔ تین بڑے شہروں بھکر، میانوالی ، پاکپتن میں سٹیٹ آف دی آرٹ نئے ماڈل بازار قائم کئے جا رہے ہیں،جن کا کام آخری مراحل میں ہے، ان ماڈل بازاروں میں سبزی ، پھل ، کریانہ ، مٹن مچھلی ، گارمنٹس، جیولری، لیڈیز گارمنٹس، کھلونے سمیت دیگر دکانیں بنائی جائیں گی ۔دکانوں کا کرایہ انتہائی کم اور مناسب رکھا جائیگا اور بجلی مفت فراہم کی جائیگی، ماڈل بازار میں صرف مرد ہی نہیں بلکہ خواتین بھی دکان کھول سکتی ہیں ۔