بھارت کشمیریوں کیخلاف سنگین جرائم میں ملوث ہے، علی رضا سید

میرپور (آئی ا ین پی ) چیئرمین کشمیر کونسل ای یو علی رضا سید نے کہا ہے کہ کشمیری قوم خودارادیت سے کبھی بھی دستبردار نہیں ہوگی۔ نجی ٹی وی سے گفتگو کرتے ہوئے علی رضا سید نے کہا کہ اقوام متحدہ کی انسانی حقوق کونسل کے 56 ویں اجلاس سے کشمیریوں اور فلسطینیوں کو امیدیں وابستہ ہیں، عالمی برادری مقبوضہ کشمیر، فلسطین میں خواتین اور بچوں کی حالت زار پر نوٹس لے۔ انہوں نے کہا کہ کشمیری قوم خودارادیت سے کبھی بھی دستبردار نہیں ہوگی، بھارت کشمیریوں کیخلاف سنگین جرائم میں ملوث ہے، انسانی حقوق کے عالمی اداروں کو بھارتی مظالم کا نوٹس لینا ہوگا۔ انہوں نے کہا کہ کشمیریوں کو حق دلوانا ہوگا، اقوام متحدہ اور یورپی یونین مسئلہ کشمیر کے منصفانہ حل کیلئے اپنا کردار ادا کریں، مقبوضہ کشمیر کے مظلوم عوام سے بھرپور یکجہتی کا اظہار کرتے ہیں، تنازعہ کشمیر عالمی سطح پر تسلیم شدہ حل طلب مسئلہ ہے۔ انہوں نے کہا کہ مقبوضہ کشمیر میں انسانی حقوق کی پامالی بڑی شدت سے جاری ہے، بھارت کالے قوانین کے ذریعے کشمیریوں پر ظلم کر رہا ہے، عالمی برادری بشمول ای یو مسئلہ کشمیر کے حل کیلئے کردار ادا کرے۔