لیبر امیدوار اسٹیلا کریزی کادفتر تہس نہس،مجھےخوفزدہ نہیں کیاجاسکتا، اسٹیلا

لندن (پی اے) گزشتہ روز دن کے 03:10اور 03:30 بجے کے دوران نامعلوم شرپسندوں نے والتھم اسٹو سے لیبر پارٹی کی پارلیمانی امیدوار اسٹیلا کریزی کے نارتھ ایسٹ لندن میں آرفور روڈپر واقع دفتر میں گھس کر توڑ پھوڑ کی۔ ان کے دفتر کی کھڑکیاں اور دروازے توڑ ڈالے اور پورا دفتر تہس نہس کردیا لیکن اسٹیلا کریزی شرپسندوں کی اس کارروائی سے قطعی خوفزدہ نہیں ہوئیں اور انھوں نے غنڈہ گردی کرنے والوں سے کہا کہ تم مجھے خوفزدہ نہیں کرسکتے۔ میٹروپولیٹن پولیس نے واقعے کی تصدیق کرتے ہوئے کہا ہے کہ واقعہ کی فوری طورپر تفتیش شروع کردی گئی ہے۔ سی سی ٹی وی میں دیکھا جاسکتا ہے کہ ایک نقاب پوش موقع پر موجود اسٹیلا کریزی سے بات کرنا چاہتا تھا، جو اس حلقے سے گزشتہ 4 عام انتخابات میں منتخب ہوتی رہی ہیں۔ اسٹیلا کریزی نے اس طرح کے غیر جمہوری حملے پر سخت ترین سزائوں کا مطالبہ کیا ہے۔ تباہی مچانے کے ذمہ دار شرپسندوں کو مخاطب کرتے ہوئے انھوں نے ایکس پر لکھا ہے کہ تم مجھے خوفزدہ نہیں کرسکے اور تمہارا سیاسی عمل سے کوئی تعلق نہیں ہے۔ بالکل اسی طرح جس طرح گھنائونے اور جھوٹے لیف لیٹ تقسیم ہو رہے ہیں، پولیس تمہیں تلاش کررہی ہے اور میں جانتی ہوں کہ والتھم اسٹو نہیں جھکے گا یا تمہارے تشدد سے متاثر ہوگا۔ تفتیشی سپرنٹینڈنٹ ڈیون برائون اس بارے میں تفتیش کررہے ہیں۔ انھوں نے گواہوں سے اپیل کی ہے کہ وہ پولیس سے رابطہ کریں۔ لیبر پارٹی کے ایک ترجمان نے کہا ہے کہ ہم کسی بھی پارٹی کے امیدواروں کو خوفزدہ کرنے کی مکمل مذمت کرتے ہیں، ہماری پارلیمانی جمہوریت کیلئے یہ بات بہت اہم ہے کہ پارلیمانی امیدوار آزادی کے ساتھ اپنی انتخابی مہم چلاسکیں۔