داغستان:یہودی و مسیحی عبادت گاہوں پر حملہ، ہلاکتیں 23ہو گئیں

25 جون ، 2024

دربنٹ(صباح نیوز) روس کے شمال میں واقع جمہوریہ داغستان میں یہودی عبادت گاہوں اور گرجا گھروں پر مسلح افراد کے حملے میں پولیس اہلکاروں سمیت ہلاک افراد کی تعداد23تک پہنچ گئی ۔غیرملکی خبر رساں ادارے کے مطابق روس کے شمالی قفقاز میں واقع جمہوریہ داغستان میں پینٹی کوسٹ کے آرتھوڈوکس تہوار کے موقع پر مسلح افراد نے دربنٹ اور مکھاچکالا شہروں کو نشانہ بنایا۔حملہ آوروں نے 2 گرجا گھروں اور2یہودی عبادت گاہوں کو اپنا نشانہ بنایا، ایک چرچ اور ایک عبادت گاہ کو نذر آتش بھی کر دیا ہے۔حملے کے نتیجے میں کم از کم15پولیس اہلکار، ایک پادری اور ایک سیکورٹی گارڈ ہلاک ہوئے ہیں جبکہ حملہ آوروں میں سے 6پولیس کی فائرنگ سے ہلاک ہو گئے ۔پولیس حکام کا کہنا ہے کہ علاقے میں سرچ آپریشن جاری ہے، اور دہشت گردوں کے مزید ساتھیوں کی تلاش جاری ہے، فی الحال حملہ آوروں کی شناخت کے حوالے سے بتانا قبل از وقت ہو گا۔