بیوی کو زندہ جلانے والےشخص کوسزائے موت اور5 لاکھ روپے ہرجانہ

فیصل آباد(اے پی پی)ایڈیشنل سیشن جج ابو الحسنات نے تھا نہ رضا آباد کے مقدمہ قتل میں ملوث ملزم کو بیوی کو زندہ جلانے کے جرم میں سزائے موت اور5لاکھ روپے ہرجانہ کی سزا کا حکم سنادیا۔ استغاثہ کے مطابق نعمت آباد گلی نمبر9کے رہائشی45سالہ ملزم نوید احمد ولد نور احمد مغل نے 24 جون 2022 کو گھریلو جھگڑے کی بناء پر اپنی بیوی صنوبر بی بی کو پیٹرول چھڑک کر آگ لگادی تھی جس سے وہ بری طرح جھلس گئی اور بعد ازاں دوران علاج ہسپتال میں دم تو ڑگئی۔ پولیس تھا نہ رضا آباد نے متوفیہ کی بیٹی فاطمہ زہرہ کی شکایت پر اس کے والد نوید احمد کے خلاف مقدمہ درج کر کے چالان عدالت میں جمع کرایا۔ آج ایڈیشنل سیشن حج ابو الحسنات نے اس کیس کا فیصلہ سناتے ہوئے جرم ثابت ہونے پر ملزم نوید احمد مغل کو تعزیرات پاکستان کی دفعہ 302 کے تحت سزائے موت جبکہ ضابطہ فوجداری کی دفعہ 544کے تحت 5 لاکھ روپے متوفیہ کے ورثاء کو بطور ہر جانہ ادا کرنے کا حکم سنایا۔ ہرجانہ کی رقم ادا نہ کرنے کی صورت میں ملزم کو 6 ماہ کی اضافی قید بھگتنا ہوگی۔