روہت شرما کا لاٹھی چارج ،بولرز کی عمدہ کارکردگی،بھارت سیمی فائنل میں

کراچی(نمائندہ جنگ) کپتان روہت شرما کے لاٹھی چارج اور بولرز کی عمدہ کارکردگی نے بھارت کو ٹی 20ورلڈکپ کے سیمی فائنل میں پہنچادیا۔ آسٹریلیا کی لاسٹ فور تک رسائی کی امیدیں دم توڑ رہی ہیں۔ بنگلہ دیش کے خلاف افغانستان آخری میچ جیت کرسیمی فائنل کھیلنے کی نئی تاریخ رقم کرسکتا ہے ۔ بھارت نے آسٹریلیا کو 24 رنز سے ہراکر ٹورنامنٹ میں ناقابل شکست رہنے کا ریکارڈ برقرار رکھا۔ بھارت نے آسٹریلیا کے خلاف ورلڈکپ کی تاریخ کا سب سے بڑا اسکور5 وکٹ پر 205 رنز بنایا ۔ بھارت کا آغاز اچھا نہ تھا، ویرات کوہلی صفر پر ہی آؤٹ ہوگئے۔ اس کے بعد کپتان روہت شرما نے 41 گیندوں پر 8 چھکے اور 7 چوکوں کی مدد سے 92 رنز کی دھواں دھار اننگز کھیل کر آسٹریلوی بولرز کا بھرکس نکال دیا ۔ وہ پلیئر آف دی میچ قرار پائے۔ گروپ ون سے دوسری سیمی فائنلسٹ ٹیم کا فیصلہ منگل کو افغانستان اور بنگلہ دیش میچ کے بعد ہوگا۔ تینوں ٹیموں کے چانس موجود ہے۔ اس وقت آسٹریلیا کا رن ریٹ زیادہ ہے۔ بنگلہ دیش 62 یا زائد رنز سے جیت کر کوالی فائی کرسکتا ہے۔ بھارت نے ٹورنامنٹ میں مسلسل ساتویں جیت حاصل کی۔ پیر کوسینٹ لوشیا میں آسٹریلوی کپتان مچل مارش نے ٹاس جیت کر بولنگ کا فیصلہ کیا۔ آسٹریلیا نے سات وکٹ پر 181رنز بنائے۔ ٹریوس ہیڈ نے43 گیندوں پر76 رنز بنائے جس میں چار چھکے اور 9 چوکے مارے۔ بمرا نے دوسرے اسپیل میں ہیڈ کو آؤٹ کرکے میچ پلٹ دیا۔ کپتان مچل مارش اور ٹریوس ہیڈ کی81 رنز کی شراکت سے آسٹریلیا کو میچ میں واپس لانے کی کوشش کی۔ مچل مارش نے دو چھکوں اور تین چھکوں کی مدد سے 37رنز بنائے۔ گلین میکسویل 19اوراسٹونس دو رنز بناکر اوپر تلے آؤٹ ہوگئے۔ آخری چار اوورز میں جیت کیلئے 58 رنز درکار تھے۔ میتھیو ویڈ ایک رن بناسکے۔ ارشدیپ سنگھ نے37رنز دے کر تین وکٹ حاصل کئے۔رشبھ پنت 15، سوریا کمار یادیو 31 اور شیوم دوبے 28 رنز بناکر آؤٹ ہوئے۔ ہاردک پانڈیا 27اور جڈیجا 9 رنز بناکر ناٹ آؤٹ رہے۔ مارکس اسٹوئنس اور مچل اسٹارک نے 2،2 وکٹیں حاصل کیں۔