لبنان پر حملے میں ایران مداخلت کر سکتا ہے، امریکی جنرل کا انتباہ

واشنگٹن(این این آئی)امریکی فوج کے اعلی عہدے دار نے خبردار کیا ہے کہ لبنان پر اسرائیل کا کوئی بھی حملہ تنازع کو وسیع تر بنانے کے خطرات میں اضافہ کر سکتا ہے۔ اس کے نتیجے میں ایران اور اس کے مسلح حلیف عناصر کی مداخلت سامنے آ سکتی ہے بالخصوص جب کہ حزب اللہ تنظیم کو خطرے کا سامنا ہو۔تفصیل کے مطابق صحافیوں سے گفتگو کرتے ہوئے امریکی جوائنٹ چیفس آف اسٹاف کے چیئرمین جنرل چارلس بران نے کہا کہ اسرائیل کو اپنے دفاع کا حق حاصل ہے۔جنرل بران کے مطابق جامع صلاحیتوں اور راکٹوں کی تعداد کے اعتبار سے لبنانی حزب اللہ فلسطینی تنظیم حماس سے زیادہ قدرت رکھتی ہے۔ انہوں نے کہا کہ میں ایران کو حزب اللہ کے لیے زیادہ بڑی سپورٹ پیش کرنے کی جانب مائل ہوتا دیکھ رہا ہوں۔امریکی جنرل نے واضح کیا کہ حزب اللہ کے حملوں کے مقابل اسرائیل کا دفاع کرنے کی امریکی صلاحیت محدود ہو سکتی ہے۔ ہماری افواج کی موجودگی کی جگہ اور لبنان اور اسرائیل کے درمیان فاصلہ کم ہونے کے باعث ہمارے لیے مشکل ہے کہ ہم اسرائیل کی اسی طرح مدد کر سکیں جس طرح اپریل میں اسرائیل پر ایرانی میزائلوں اور ڈرون حملوں کو روکنے کے وقت معاونت کی تھی۔