ڈیفنس :شہری کی فائرنگ سے ڈاکو زخمی، ماں اور بیٹا بھی زد میں آگئے

کراچی (اسٹاف رپورٹر) ڈیفنس میں شہری کی فائرنگ سے ڈاکو زخمی ہو گیا جبکہ ڈاکو کی فائرنگ سے ماں اور بیٹا زخمی ہوگئے ۔تفصیلات کے مطابق ڈیفنس تھانے کی حدود سن سیٹ بلیوارڈ کے قریب موٹر سائیکل سوار ملزمان شہریوں کو لوٹ رہے تھے کہ اس دوران کار سوار شہری نے ان پر فائرنگ کردی ، ملزمان کی فائرنگ سے وہاں سے گذرنے والی کار سوار خاتون اور ایک لڑکا زخمی ہوگئے ، واقعہ کی اطلاع پر پولیس کی بھاری نفری موقع پر پہنچ گئی ، پولیس حکام کے مطابق کار سوار 22سالہ حاذق ولد اویس اور اس کی والدہ 45 سالہ صائمہ زوجہ اویس کو فوری طور پر کالا پل پر واقع نجی اسپتال منتقل کیا گیا جبکہ پولیس نے موقع پر پہنچ کر زخمی ملزم کو حراست میں لے کر جناح اسپتال منتقل کیا ، پولیس حکام کا کہنا ہے کہ ابتدائی معلومات کے مطابق ملزم امیر علی نے کار سوار حاذق نامی شہری کو لوٹنے کی کوشش کی تھی جس پر اس نے اپنے لائسنس یافتہ اسلحے سے فائرنگ کردی ، دونوں ماں بیٹا کو ابتدائی طبی امداد کے بعد اسٹیڈیم روڈ پر واقع نجی اسپتال منتقل کردیا گیا ، ماں کی حالت تشویشناک بتائی جاتی ہے۔